Monday, 11 August 2014

ယင်လက်ခ်ရှီနာဝပ်ထရာ ပြည်ပခရီးမှ ထိုင်းနိုင်ငံသို့ပြန်လည်ရောက်ရှိ

နိုင်ငံမှ ထွက်ပြေးသွားပြီဟု ခန့်မှန်းမှုများ ထွက်ပေါ်ခဲ့သော်လည်း ဝန်ကြီးချုပ်ဟောင်း ယင်လက်ခ် ရှီနာဝပ်ထရာသည် ကြိုတင် စီစဉ်ထားသည့် အချိန်ဇယားအတိုင်း ထိုင်းနိုင်ငံသို့ ပြန်လည် ရောက်ရှိခဲ့ကြောင်း သိရှိရသည်။
ယင်လက်ခ်သည် ထိုင်းနိုင်ငံတွင် အာဏာသိမ်းထားသည့် စစ်တပ်အစိုးရ၏ ခွင့်ပြုချက်ဖြင့် ဇူလိုင်လအတွင်းက ဥရောပနှင့် အမေရိကန် ပြည်ထောင်စုသို့ အပန်းဖြေခရီး ထွက်ခွာသွားခဲ့သည်။ သူမ၏ ခရီးစဉ် အတောအတွင်း ယင်လက်ခ်သည် အစ်ကိုဖြစ်သူ ထိုင်းဝန်ကြီးချုပ်ဟောင်း သက်ဆင်ရှီနာဝပ်ထရာ၏ (၆၅)နှစ်ပြည့် မွေးနေ့သို့ တက်ရောက်ခဲ့ကြောင်း သတင်းများလည်း ထွက်ပေါ်ခဲ့သည်။ မောင်နှမ နှစ်ဦးတို့သည် ပြင်သစ်နိုင်ငံ၊ ပဲရစ်မြို့တော်တွင် ဆုံဆည်းခဲ့ခြင်းဟု ဆိုသည်။
ယင်လက်ခ်သည် ထိုင်းနိုင်ငံသို့ ပြန်လာဖွယ် မရှိတော့ကြောင်း ခန့်မှန်းမှုများ ထွက်ပေါ်နေသည့်တိုင် ဩဂုတ်(၁၀)ရက်က စင်းလုံးငှား ဂျက်လေယာဉ် တစ်စီးဖြင့် ဘန်ကောက်သို့ ပြန်လည် ဆိုက်ရောက်လာခဲ့သည်။ ယင်လက်ခ်သည် ထိုင်းနိုင်ငံတွင် အမျိုးသား ခြစားမှု တိုက်ဖျက်ရေး ကော်မရှင် (NACC)၏ ခြစားမှုဆိုင်ရာ စွပ်စွဲထားမှု တစ်ရပ်ကိုလည်း ရင်ဆိုင် ဖြေရှင်းရဖွယ် ရှိနေသည်။ ပြစ်မှုထင်ရှားကြောင်း တွေ့ရှိပါက ယင်လက်ခ်သည် ထောင်ဒဏ်(၅)နှစ်ထိ ပြစ်ဒဏ်ချမှတ်ခြင်း ခံရနိုင်သလို နိုင်ငံရေး နယ်ပယ်နှင့် ပတ်သက်ဆက်နွယ်မှုမှ တားဆီးခံရမည့် အလားအလာ ရှိနေသည်။
ယင်လက်ခ်သည် (၂၀၁၁)ခုနှစ်၊ ဩဂုတ်လဆန်းတွင် ထိုင်းနိုင်ငံ၏ (၂၈)ဦးမြောက် ဝန်ကြီးချုပ်အဖြစ် စတင်တာဝန်ယူခဲ့ပြီး (၂၀၁၄)ခုနှစ်၊ မေ(၇)ရက်တွင် ထိုင်းအခြေခံ ဥပဒေပြု ခုံရုံးက သူမအနေဖြင့် ရာထူးခန့်အပ်မှု တစ်ခုတွင် ဘောင်ကျော်၍ ဩဇာအာဏာ အသုံးပြုခဲ့ကြောင်း အတည်ပြု တွေ့ရှိခဲ့သည့်အတွက် ရာထူးမှ နုတ်ထွက်ခဲ့ရသည်။ ထိုင်းတွင် စစ်တပ်က အာဏာသိမ်းပြီးနောက် ယင်လက်ခ်ကို ရက်ပိုင်းမျှ ခေါ်ယူထိန်းသိမ်းပြီး ပြန်လွှတ်ပေးခဲ့သည်။





0 Comments:

Post a comment

Subscribe to Post Comments [Atom]

<< Home