ပါတီရဲ့ အမှတ်အသားသစ်ကို အမျိုးသား ဒီမိုကရေစီအဖွဲ့ချုပ်က ကြေညာလိုက်ပါတယ်။

လာမယ့်ကြားဖြတ်ရွေးကောက်ပွဲမှာသုံးမယ့် ပါတီရဲ့ အမှတ်အသားသစ်ကို အမျိုးသား ဒီမိုကရေစီအဖွဲ့ချုပ်က ကြေညာလိုက်ပါတယ်။ မြန်မာအစိုးရပိုင် သတင်းစာထဲမှာ တနင်္လာနေ့က ဖော်ပြလိုက်တဲ့ အမျိုးသား ဒီမိုကရေစီအဖွဲ့ချုပ်ရဲ့ သင်္ကေတ ကြေညာချက်ထဲမှာ ပါတီအလံနဲ့ သဏ္ဍန်တူတဲ့ အနီရောင် အောက်ခံပေါ်မှာ ရွှေဝါရောင် ခွပ်ဒေါင်းက ကြယ်ဖြူကို ဦးတိုက်ထားတဲ့ပုံကို ဖော်ပြထားပါတယ်။ တခြား ပါတီတချို့က အရင် အမျိုးသား ဒီမိုကရေစီအဖွဲ့ချုပ်ရဲ့ ခမောက်တံဆိပ် အမှတ်အသားကို သုံးစွဲလာခဲ့တာမို့ ခြားနားမှုရှိအောင် အခုလို တံဆိပ်အသစ် ထုတ်ပြန် သုံးစွဲရတာဖြစ်တယ်လို့ အမျိုးသားဒီမိုကရေစီအဖွဲ့ချုပ်က ဆိုပါတယ်။ ဒီအကြောင်းကို ကိုဝင်းမင်းက မေးမြန်းတင်ပြထားပါတယ်။

ဒေါ်အောင်ဆန်းစုကြည် ဦးဆောင်တဲ့ အမျိုးသားဒီမိုကရေစီအဖွဲ့ချုပ် NLD က မြန်မာ့လွတ်လပ်ရေးနဲ့ ဒီမိုကရေစီရေး လှုပ်ရှားမှုတွေမှာ ကျောင်းသားတွေကို ကိုယ်စားပြုခဲ့တဲ့ ခွပ်ဒေါင်းပုံရိပ်ကို ပါတီရဲ့ ရွေးကောက်ပွဲတံဆိပ်အဖြစ် သုံးဖို့ ရွေးချယ် ထုတ်ပြန်လိုက်ပါတယ်။ အခုလို ရွေးချယ်လိုက်တာကို ပြီးခဲ့တဲ့အပတ်က လုပ်ခဲ့တဲ့ NLD ပါတီရဲ့ ဗဟိုအလုပ်မှုဆောင် အစည်းအဝေးကနေ ဆုံးဖြတ်ခဲ့တာဖြစ်တယ်လို့ NLD ပါတီပြောရေးဆိုခွင့်ရှိသူ ဦးဉာဏ်ဝင်းက ဆိုပါတယ်။ NLD ရဲ့ ဒီ ရွေးကောက်ပွဲ တံဆိပ်မှာ NLD အလံမှာပါတဲ့ပုံနဲ့ အတူတူပဲဖြစ်တယ်၊ ကွဲတာက ဒီတံဆိပ်အောက်ပိုင်းမှာ အပြာရောင်နဲ့ရေးထားတဲ့ အမျိုးသားဒီမိုကရေစီအဖွဲ့ချုပ် ဆိုတာ ထပ်ပါတာပဲဖြစ်တယ်လို့ ဦးဉာဏ်ဝင်းက ပြောပါတယ်။

အရင်က NLD အနေနဲ့ ၁၉၉၀ ခုနှစ် ရွေးကောက်ပွဲတွေမှာ အပြတ်အသတ် အနိုင်ရခဲ့တုန်းကတော့ မြန်မာနိုင်ငံမှာ လူဦးရေအများဆုံးဖြတ်တဲ့ လယ်သမားတွေကို ကိုယ်စားပြုတဲ့ ခမောက်တံဆိပ်ကို ရွေးကောက်ပွဲမှာ အသုံးပြုခဲ့ပါတယ်။ ဒါပေမဲ့ ဘာကြောင့် အခုလို တံဆိပ်သစ်ပြောင်းပြီး ကြေညာခဲ့ရတယ် ဆိုတာကို ဦးဉာဏ်ဝင်းက အခုလို ရှင်းပြပါတယ်။

“အခု ဆင်တူယိုးမှား ခမောက်ရှိတယ်။ ခမောက် သုံးလုံးရှိတယ်။ တခြားပါတီတွေက ရွေးကောက်ပွဲ သင်္ကေတတွေပေါ့။ အဲဒီတော့ ကျနော်တို့နဲ့ ခမောက်သင်္ကေတနဲ့ မဆိုင်ဘူးလို့ ကြေညာဖို့ လိုအပ်တယ်လို့ ယူဆတာ။ အဲဒါကြောင့် NLD ဟာ ရွေးကောက်ပွဲ အမှတ်တံဆိပ်အဖြစ် ခမောက်ကို အခု မသုံးတော့ဘူး။ အခု NLD ရဲ့ ပါတီအမှတ်တံဆိပ်ဟာ ခွပ်ဒေါင်း၊ NLD အမျိုးသားဒီမိုကရေစီအဖွဲ့ချုပ် ဆိုတဲ့ စာတမ်းပါတဲ့ဟာ ဖြစ်ပါတယ်လို့ ပြည်သူတွေရှင်းလင်းသွားအောင်လို့ သတင်းစာထဲမှာ ထည့်တာပါ။”

၁၉၉၀ ရွေးကောက်ပွဲမှာ အနိုင်ရခဲ့တဲ့ NLD ကို အာဏာမလွှဲပေးဘဲ ဆက်ပြီးအုပ်ချုပ်ခဲ့တဲ့ ဗိုလ်ချုပ်မှူးကြီးသန်းရွှေ ဦးဆောင်တဲ့ စစ်အစိုးရဟောင်း အနေနဲ့ ၂၀၁၀ မှာ ရွေးကောက်ပွဲတွေကို ထပ်မံကျင်းပပေးခဲ့ပါတယ်။ ၂၀၁၀ ရွေးကောက်ပွဲ ကျင်းပနေချိန်မှာ ဒေါ်အောင်ဆန်းစုကြည်က အကျယ်ချုပ် ကျနေခဲ့ပြီး တင်းကျပ်တဲ့ ရွေးကောက်ပွဲ ဥပဒေတွေနဲ့ စစ်အစိုးရက တဘက်သတ် ရေးဆွဲခဲ့ပြီး ဒီမိုကရေစီမကျဘူးလို့ ယူဆခဲ့တဲ့ ၂၀၀၈ အခြေခံဥပဒေကြောင့် NLD အနေနဲ့ ရွေးကောက်ပွဲမှာ ၀င်မပြိုင်ခဲ့ပါဘူး။ ဒါပေမဲ့ အခုလို NLD က ရွေးကောက်ပွဲမှာ ၀င်မပြိုင်ခဲ့တဲ့အပေါ် သဘောထားကွဲပြီး ရွေးကောက်ပွဲ ၀င်ပြိုင်ခဲ့တဲ့ ဦးခင်မောင်ဆွေ ဦးဆောင်တဲ့ အမျိုးသားဒီမိုကရေစီအင်အားစု NDF ပါတီက ဒီ ခမောက်တံဆိပ်ကို NLD ကန့်ကွက်တဲ့ကြားထဲကပဲ ရွေးကောက်ပွဲ ကော်မရှင်က ခွင့်ပြုလို့ အသုံးပြုလာခဲ့ပါတယ်။

နောက်ပိုင်း ရွေးကောက်ပွဲအပြီး NDF ပါတီကနေ ထပ်ခွဲလာခဲ့တဲ့ ဦးသိန်းညွှန့် ဦးဆောင်တဲ့ အမျိုးသားဒီမိုကရေစီ ပါတီသစ်ကလည်း ခမောက်သုံးခုပါတဲ့ တံဆိပ်ကို ထပ်ပြီး အသုံးပြုလာခဲ့ပါတယ်။ ဒါကြောင့်မို့ ဒီပါတီတွေနဲ့မဆိုင်ဘဲ NLD က သီးသန့်ဖြစ်တယ် ဆိုတာကို ပြနိုင်ဖို့ အခုလို တံဆိပ်သစ်ကို ရွေးချယ်ဆုံးဖြတ် ထုတ်ပြန်ခဲ့တာဖြစ်တယ်လို့ ဦးဉာဏ်ဝင်းက ဆိုပါတယ်။ ဒီအလံမှာရော၊ တံဆိပ်မှာပါ ပါတဲ့ အရောင်နဲ့သင်္ကေတတွေရဲ့ အဓိပ္ပါယ်ကို ဦးဉာဏ်ဝင်းက အခုလို ရှင်းပြပါတယ်။

“အခုကတော့ အနီရောင်က ရဲရင့်ခြင်းပေါ့ဗျာ။ ခွပ်ဒေါင်းဆိုတာကတော့ တကယ့်ကို တိုက်ပွဲဝင် အမှတ်အသားပေါ့။”

အမျိုးသားဒီမိုကရေစီအဖွဲ့ချုပ် အထွေထွေ အတွင်းရေးမှူး ဒေါ်အောင်ဆန်းစုကြည်ရဲ့ ရုံး ဒါရိုက်တာ ဦးဝင်းထိန်ကလည်း ဒီတံဆိပ် အမှတ်အသားတွေဟာ အပြောင်းအလဲအတွက် ရုန်းကန်လှုပ်ရှားမှုတွေကို ကိုယ်စားပြုတာဖြစ်တယ်၊ ခွပ်ဒေါင်းကလည်း ကျောင်းသားတွေရဲ့ ၁၉၈၈ ခုနှစ် ဒီမိုကရေစီရေး စွန့်လွှတ်လှုပ်ရှားမှုတွေကို အသိအမှတ်ပြုတာဖြစ်တယ်လို့ အေအက်ဖ်ပီ သတင်းဌာနကို ပြောခဲ့ပါတယ်။ NLD အနေနဲ့ ၂၀၁၀ ရွေးကောက်ပွဲတွေကို သပိတ်မှောက်ခဲ့ပေမဲ့ ရွေးကောက်ပွဲအပြီး ဒေါ်အောင်ဆန်းစုကြည် လွတ်လာအပြီးနဲ့ ဦးသိန်းစိန် အစိုးရတက်လာအပြီးမှာ ဒီခေါင်းဆောင်နှစ်ဦးတို့ တွေ့ဆုံကြတဲ့ ဆွေးနွေးပွဲတွေ ကနေတဆင့် ပါလီမန်သစ်ဘက်ကလည်း ရွေးကောက်ပွဲ ဥပဒေတွေကို လျှော့ပေါ့ပေးခဲ့တဲ့အပေါ်မှာ စပွင့်လင်းလာတဲ့ အခြေအနေကို ဆုပ်ကိုင်ပြီး NLD အနေနဲ့ ရှေ့နှစ်မှာကျင်းပမယ့် အမတ်နေရာ ၅၀ နီးပါး လျစ်လပ်ထားတဲ့နေရာအတွက် ကြားဖြတ်ရွေးကောက်ပွဲတွေမှာ ပါဝင်ဖို့ ဆုံးဖြတ်ခဲ့ပါတယ်။

ဒီကြားဖြတ် ရွေးကောက်ပွဲတွေကို ဘယ်နေ့ ကျင်းပရမယ်ဆိုတာ မသိသေးပေမဲ့ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်ကတော့ သူမအနေနဲ့လည်း ဒီရွေးကောက်ပွဲတွေမှာ ၀င်ပြိုင်ဖို့ရှိတယ်၊ အခုလို ရွေးကောက်ပွဲတွေမှာ အမျိုးသားဒီမိုကရေစီအဖွဲ့ချုပ် အနေနဲ့ ပြည်တွင်းစစ် ရပ်စဲရေး၊ တရားဥပဒေ စိုးမိုးရေးနဲ့ အခြေခံဥပဒေ ပြင်ဆင်ရေးတွေကို ပါတီရဲ့ အဓိကဦးတည်ချက်တွေအဖြစ် ဦးစားပေးလုပ်သွားဖို့ ရှိတယ်လို့ ပြောလာခဲ့ပါတယ်။

ပြုပြင်သင့်သည်မြန်မာနိုင်ငံပညာရေး

အစိုးရမှ မြန်မာ့ပညာရေးတိုးတက်ရန် ပုဂ္ဂိလကကျောင်း ဥပဒေပြဋ္ဌာန်းကာ အခြေခံ
ကျောင်းများ တည်ထောင်ခွင့်ပြုလိုက်သည်ကို ကြိုဆိုသော်လည်း ခေတ်နှင့် မလျော်ညီတော့သည့် သင်ရိုးများကို
ပြန်လည်ပြင်ဆင်သင့်ပြီဟု ပညာရေးဝန်ထမ်းဟောင်းများနှင့် ပညာရေးဝန်ဆောင်မှုပေးနေသူများက ပြောသည်။

မြန်မာနိုင်ငံ၏ အခြေခံကျောင်းများတွင် ကျင့်သုံးနေသည့် လက်ရှိသင်ရိုးညွှန်းတမ်းများသည် လွန်ခဲ့သည့် အနှစ် ၃ဝ က သင်ရိုးများဖြစ်နေကာ ခေတ်မီအကြောင်းအရာများ မပါရှိရှိခြင်း၊ ခေတ်မီ ဝေါဟာရများနှင့် သရုပ်ဖေါ်ပုံများ မပါရှိခြင်းတို့ကြောင့် မြန်မာ့ပညာရေးသည် အိမ်နီးချင်းနိုင်ငံများနှင့် နှိုင်းယှဉ်လျှင်ပင် နောက်ကျနေခြင်းကြောင့် သင်ရိုးများကို ပြင်ဆင်သင့်သည်ဟု ယူဆကြောင်း အထက်မြန်မာပြည်အခြေခံပညာ ညွှန်ကြားရေးမှူးအဖြစ် တာဝန်ထမ်းဆောင်ခဲ့ဖူးသူ ဆရာဦးနိုင်ငွေသိန်းကသတင်းထောက်များကိုပြောသည်။

" အခြေခံပညာမှာ တကယ့်အတွေ့အကြုံရှိတဲ့ ပုဂ္ဂိုလ်တွေ အများကြီးရှိတယ် အဲဒါတွေခေါ်ပြီးတော့ ပြင်ဖို့လိုတယ်။ " ဟု ဦးနိုင်ငွေသိန်းက ပြောသည်။

ယခုလ နှစ်ရက်နေ့တွင် ပြဋ္ဌာန်းလိုက်သည့် ကိုယ်ပိုင်ကျောင်း မှတ်ပုံတင် ဥပဒေတွင် ကိုယ်ပိုင်ကျောင်းများသည် ပညာရေးဝန်ကြီးဌာနမှ သတ်မှတ်ထားသော သင်ရိုးမာတိကာများအတိုင်း သင်ကြားရမည်ဖြစ်ပြီး ထိုဘာသာရပ်များနှင့် ပတ်သက်သည့် ဆက်စာ သင်ခန်းစာများကိုသာ သင်ကြားခွင့်ရှိသည်ဟု ပြဋ္ဌာန်းထားသည်။

ပြင်ဦးလွင် စစ်တက္ကသိုလ်တွင် မြန်မာစာ ကထိက တာဝန်ထမ်းဆောင်ဖူးသူ စာရေးဆရာကြီး ဦးအောင်သင်း ကလည်း ယခု လက်ရှိ အခြေခံပညာသင်ရိုးများကို ပြန်လည်ပြင်ဆင်သင့်ကြောင်းပြောဆိုပြီး ပညာရေးကို လွတ်လပ်မှု ပေးသင့်ကြောင်း မဇ္ဈိမကိုပြောသည်။

" ပညာရေး တိုးတက်ခွင့်မရရင် တိုင်းပြည်ဘယ်တော့မှ တိုးတက်ခွင့်မရဘူး၊ ပညာသင်ကြားခွင့်နဲ့ ပတ်သက်ပြီး
ပြဋ္ဌာန်းချက်တွေနဲ့ ပတ်သက်လို့ အစိုးရက ဘာမှ စွက်ဖက်ခွင့် မရှိတဲ့တိုင်းပြည်ဟာ တိုးတက်တာပဲ။ ဘာဖြစ်လို့လဲ ဆိုတော့ ပညာဆိုတာဟာ ကြိုက်သလောက် လွန့်လူးပါစေ၊ ကြိုက်သလောက် ကျက်စားပါစေ၊ ကြိုက်သလောက်
မြှင့်တင်ပါစေ အဲဒီဟာကို လုံးဝ လွတ်လပ်ခွင့်ပေးရတယ်၊ အဲဒါကို အစိုးရက အကူအညီပေးရတယ်၊ အဲဒါဟာ တိုင်းပြည် တိုးတက်မှုရဲ့ အကြောင်းရင်းကြီးပဲ။" ဟုပြောသည်။

လက်ရှိ အခြေခံပညာရေး၏ သင်ရိုးညွှန်းတမ်းများသည် ကလေးများ၏ တွေးခေါ်နိုင်စွမ်းနှင့် ကိုယ်ပိုင်ဖန်တီးနိုင်စွမ်းတို့အတွက် အားနည်းနေသေးသည်ဟု မန္တလေးမြို့ အောင်မြေသာဇံမြို့နယ်ရှိ ဖေါင်တော်ဦး ပရဟိတ ဘုန်းတော်ကြီးသင် ပညာရေးကျောင်းမှ ကျောင်းအုပ်ဆရာတော်ကြီး ဦးနာယက က မဇ္ဈိမကို မိန့်ကြားသည်။

ဖေါင်တော်ဦး ဘုန်းတော်ကြီးကျောင်းသည် ပညာရေးဝန်ကြီးဌာနမှ ချမှတ်ပေးသည့် သင်ရိုးများအတိုင်း သင်ကြား
နေသော်လည်း ကလေးများ တွေးခေါ်နိုင်စွမ်းနှင့် ဖန်တီးနိုင်စွမ်းတို့ကို မြှင့်တင်ပေးသည့် သင်ကြားနည်းစနစ်ကို သုံးသည်ဟု ဆရာတော် ဦးနာယက က ဆက်လက်မိန့်ကြားသည်။

"သင်ရိုးကတော့ ပညာရှင်တွေ ပြင်ဖို့ စဉ်းစားပေါ့၊ ဦးဇင်းအနေနဲ့ကတော့ သင်ကြားနည်းတွေပေါ့။ (ကလေးဗဟိုပြု သင်ကြားနည်းစနစ်) တို့ ( ဝေဖန်ပိုင်းခြားတတ်ရန် စာဖတ်ခြင်းနှင့် စာရေးခြင်း)တို့ အဲဒီလိုဘက်ကို ပို့နိုင်တာ နည်းနေတယ်လို့ စဉ်းစားမိတယ်၊ အဲဒီ စနစ်ကို သွားနိုင်ရင်တော့ ပိုကောင်းတယ်လို့ ထင်ပါတယ်။ သင်ရိုးပြောင်း
နေရင်လည်း ကြာနေမှာစိုးတော့ ကလေးတွေအတွက် အဲဒီ သင်ရိုးတွေကိုပဲ Thinking Process တွေရအောင် သင်ပေးနေဟုသိရသည်

ပြဋ္ဌာန်းလိုက်သည့် ကိုယ်ပိုင်ကျောင်း ဥပဒေအရ ပုဂ္ဂလိကကျောင်းများ ပေါ်ထွန်းလာနိုင်သော်လည်း ငွေကြေး တတ်နိုင်သူများသာ တက်နိုင်သည့် ကျောင်းများပေါ်ထွက်လာမည်ကို စိုးရိမ်ကြောင်းလည်း မူလတန်းမှ တက္ကသိုလ် ဝင်တန်း အထိ ကျောင်းသား ၆,ဝဝဝ ကျော်အတွက် အခမဲ့ သင်ကြားပေးနေသည့် ကျောင်းအုပ်ဆရာတော် ဦးနာယက ဆက်လက် မိန့်ကြားသည်။ 

သို့သော် ပညာသင်ကြားမှုအတွက် ငွေးကြေးမတတ်နိုင်သူများအတွက် ဘုန်းတော်ကြီးများ စီမံခန့်ခွဲကာ ဆရာများ ငှားရမ်းသင်ကြားပေးနိုင်မည့် ဘုန်းတော်ကြီး အခမဲ့ ပညာသင်ကျောင်းများ ဖွင့်လှစ်ပေးနိုင်ရန် စွမ်းဆောင်သင့်
ကြောင်း စာရေးဆရာကြီး ဦးအောင်သင်းက တိုက်တွန်းသည်။

"ဘုန်းကြီးကျောင်းတွေ ဖွင့်ပေးရမယ်၊ ဘုန်းကြီးတွေ ဦးစီးပြီးတော့ ဖွင့်ပေးရမယ်၊ ဘုန်းကြီးတွေက ဘုရားတည်တာ ပြိုင်နေကြတယ်၊ ဘုရားကို ရွှေချလို့ တိုင်းပြည်အနာဂတ် မတောက်ပဘူး၊ လူငယ်တွေကို ရွှေချမှ အနာဂတ်
တောက်ပမယ်။ ဘုန်းကြီးတွေ အဲဒါ သတိကြီးဖို့ လိုတယ်။ မြန်မာပြည်မှာရှိတဲ့ ဘုန်းကြီးတွေက ခေတ်သစ် ပညာရေးကို မျက်စိပွင့်ဖို့လိုတယ်။ ကိုရင်တွေလည်း သင်ပေါ့၊ ပုဂ္ဂလိက ကျောင်းဖွင့်ပစ်ပေါ့၊ ကိုရင်တွေလည်း သင်္ကန်းဝတ်တွေနဲ့ ကျောင်းတက်ပေါ့။ ဘုန်းကြီးတွေ လူထွက်သွားတော့လည်း လူ့လောကမှာ ပညာတတ်ရင် အမြတ်ဖြစ်တာပဲ။" ဟုသတင်းထောက်များကိုပြောသည်။ 

ပြဋ္ဌာန်းလိုက်သည့် ကိုယ်ပိုင်ကျောင်းဥပဒေအရ ကိုယ်ပိုင်ကျောင်း တည်တောင်လိုသူများအနေဖြင့် အခြေခံ ပညာ မူလတန်းမှ အထက်တန်းအထိ ကိုယ်ပိုင်ကျောင်း ဖွင့်ခွင့်ရှိသည်။ အဆိုပါကျောင်းများကို သက်ဆိုင်ရာ တိုင်း၊
ပြည်နယ်များရှိ အခြေခံ ပညာဦးစီးဌာန၏ ညွှန်ကြားရေးမှူးချုပ်နှင့် ပညာရေးမှူးတို့မှ ကြပ်မတ် ကွပ်ကွဲမည် ဖြစ်သည် ဟု ဥပဒေက ပြဋ္ဌာန်းသည်။

ကိုယ်ပိုင်ကျောင်းများသည် ထပ်ဆောင်းဘာသာရပ်နှင့် ထပ်ဆောင်း ဘာသာစကားများကို သက်ဆိုင်ရာ ပညာရေး ဝန်ကြီးဌာန၏ ခွင့်ပြုချက်ဖြင့် သင်ကြားနိုင်မည်ဟုလည်း ဥပဒေတွင် ဖေါ်ပြထားသည်။ ကိုယ်ပိုင်ကျောင်းဆရာအဖြစ် လုပ်ကိုင်လိုသူများသည် ပြည်တွင်း၊ ပြည်ပတက္ကသိုလ် တခုခုမှ ပါရဂူဘွဲ့ သို့မဟုတ် ပညာရေးဘွဲ့ရရှိသူ၊ ဆရာ အတတ်သင် ပညာဆိုင်ရာ ဒီပလိုမာ လက်မှတ်ရရှိပြီးသူ အခြေခံပညာကျောင်းများတွင် အနည်းဆုံး လုပ်သက် ငါးနှစ်ရှိသူတို့ လျှောက်ထားနိုင်သည်ဟု ဥပဒေတွင် ပါရှိသည်။

ကိုယ်ပိုင်ကျောင်းများသည် ပြည်ပနိုင်ငံအကူအညီဖြင့် တည်ထောင်သည့် ကျောင်းမဖြစ်စေရန်နှင့် နိုင်ငံခြား အဖွဲ့ အစည်း အကူအညီဖြင့် တည်ထောင်သောကျောင်း မဖြစ်ရန် ကန့်သတ်ထားပြီး သာသနာပြုကျောင်းမဖြစ်ရဟုလည်း ဥပဒေက ကန့်သတ်ထားသည်။

ယင်းအပြင် ကိုယ်ပိုင်ကျောင်း တည်ထောင်လိုသူများသည် မြန်မာနိုင်ငံသား ဖြစ်ရမည်ဟုလည်း ပြဋ္ဌာန်းထားသည်။

ကိုယ်ပိုင်ကျောင်းများသည် နိုင်ငံတော်၏ အကျိုးကို ထိခိုက်သော သို့မဟုတ် နိုင်ငံတော်၏ မူဝါဒနှင့် ဆန့်ကျင်သော အကြောင်းအရာများ သင်ကြားမှု၊ လေ့ကျင့်ခန်းပေးမှု သို့မဟုတ် ထိုသို့ပြုလုပ်ရန် စီစဉ်ဆောင်ရွက်ခြင်း မပြုရဟု ကန့်သတ်ချက်များ ပါရှိသည်။

ကိုယ်ပိုင်ကျောင်းဆရာလက်မှတ်မရှိဘဲ ကျောင်းဆရာအဖြစ် ဆောင်ရွက်ခွင့် မရှိသကဲ့သို့ သင်ကြားမှုဘာသာရပ်နှင့် သက်ဆိုင်ခြင်းမရှိသည့် နိုင်ငံရေး (သို့မဟုတ်) ဘာသာရေးဆိုင်ရာ အကြောင်းအရာများကို ဟောပြောပို့ချခြင်း မပြုရဟုလည်း တားမြစ်ထားသည်။ ဥပဒေပါ အချက်အလက်များကို ကျူးလွန်ပါက ထောင်ဒဏ် သုံးနှစ်နှင့် ငွေဒဏ် သုံးသိန်းတို့ကို အမြင့်ဆုံးပြစ်ဒဏ်အဖြစ် သတ်မှတ်ထားသည်။

ထွက်ပေါ်နေသည့် သတင်းသည် အမှန်ဖြစ်ခဲ့လျှင် ဤသည်နိုင်ငံရေး ပရိယာယ် တစ်ရပ်သာ ဖြစ်ကြောင်း KIO ဒု-နိုင်ငံခြားရေး ဝန်ကြီး ဗိုလ်မှူးကြီးဂျိန်း လန်ထောင်က ဆိုပါသည်။

သမ္မတ ဦးသိန်းစိန်မှ ဒီဇင်ဘာလ (၁၀) ရက်နေ့ နေ့စွဲဖြင့် ကာကွယ်ရေး ဦးစီးချုပ် (ကြည်း) သို့ အကြောင်းကြားစာ ပေးပို့ပြီး ကချင်ပြည်နယ်၌ ဖြစ်ပွားနေသည့် စစ်ပွဲများ အဆုံးသတ်ရန် ညွှန်ကြားခဲ့သည်ဟု ထွက်ပေါ်နေသည့် သတင်းသည် အမှန်ဖြစ်ခဲ့လျှင် ဤသည်နိုင်ငံရေး ပရိယာယ် တစ်ရပ်သာ ဖြစ်ကြောင်း KIO ဒု-နိုင်ငံခြားရေး ဝန်ကြီး ဗိုလ်မှူးကြီးဂျိန်း လန်ထောင်က ဆိုပါသည်။

“ဒါတွေက မျက်လှည့် ပြတာပါဗျာ၊ ကချင်ပြည်နယ် ဝန်ကြီးကနေ ပြည်တော်ကို တောင်းဆိုထားတာပါတဲ့၊ ကျွန်တော် တို့သိပါတယ်၊ ဘယ်ဟုတ်မလဲ၊ ပါလီမန်မှာ သတင်းစာ ရှင်းလင်းပွဲလုပ်တာ၊ တစ်နှစ်အတွင်းမှာ KIO ကို ချေမှုန်းသွား မယ်လို့ သမ္မတကပြောသွားခဲ့တာရှိပါတယ်။ အဲဒီတော့ ဒါတွေဟာ သူကိုယ်တိုင် ခိုင်းတာဖြစ်ကြောင်းဆိုတာ ထင်ရှားလာတယ်လေ၊ အခုမှ လက်ခံတယ်။ ငြိမ်းချမ်းရေး လုပ်ရအောင်၊ ဟိုဟာ လုပ်ရအောင်၊ ဒီဟာ လုပ်ရအောင် ပြောတာဟာ သဘာဝ မကျပါဘူး” ဟု ဗိုလ်မှူးကြီး ဂျိန်းလန်ထောင်က ဆိုပါသည်။

၂၀၁၁ ဇွန်လ (၉) ရက်နေ့မှ KIO နှင့် စစ်အစိုးရကြား တင်းမာမှု စတင်ဖြစ်ပွားခဲ့ပြီး၊ ဇွန်လ (၁၃) ရက်အထိ KIO က မပစ်ခတ်ရန် စောင့်ဆိုင်း ခဲ့သော်လည်း နောက်ဆုံး အခြေအနေရ တိုက်ပွဲကို အကောင်အထည်ဖော်ခဲ့ရသည်။

အစိုးရဖက်က KIA နှင့် အပစ်အခတ် ရပ်စဲရေးကို ဖျက်ခဲ့သည့် အကြောင်းမှာ KIA ထိန်းချုပ်နယ်မြေတွင် တာပိန်ရေအား လျှပ်စစ်လုံခြုံရေး ကိစ္စ အငြင်းပွားမှုကြောင့် ဖြစ်ပါသည်။ ဤကိစ္စတွင် KIO ဆက်ဆံရေးရုံးမှ ဒုတပ်ကြပ် ချမ်းရင်းကို နအဖတပ်မှ နှိပ်စက်၍ သတ်ဖြတ်ခဲ့ရာမှ စတင်ပြီး ယခုချိန်ထိ (၆) လ ကျော်ကြာတိုက်ပွဲများဖြစ်လာခဲ့ပါသည်။

ထိုအတောအတွင်း KIA နှင့် နအဖတို့ အပစ်အခတ် ရပ်စဲရန် အကြိမ်ကြိမ်ဆွေးနွေးမှုများ ရှိခဲ့သော်လည်း သဘောတူညီချက် တစုံတရာမရရှိသေးပေ။

ကလေးသူငယ်များအား ကူးသန်း ရောင်းဝယ်နေခြင်းသည် တိုင်းပြည်၏ အနာဂတ်အား အလောင်းအစား ပြုလုပ်နေခြင်း ဖြစ်ကြောင်း နိုင်ငံတကာ ကလေးကူးသန်းရောင်းဝယ်ရေးနေ့၌ လူထုခေါင်းဆောင်
ဒေါ်အောင်ဆန်းစုကြည်က ပြောဆိုလိုက်သည်။ 

ထိုင်း-မြန်မာနယ်စပ် မဲ့ဆောက်မြို့တွင် ကလေးကူးသန်း ရောင်းဝယ်မှုတားဆီးရေးအဖွဲ့ - Burma ACT အဖွဲ့မှ ဦးစီး ပြုလုပ်သည့် ယင်းအထိမ်းအမှတ်နေ့ပွဲသို့ ပေးပို့သည့် ဗီဒီယိုမိန့်ခွန်းမှတဆင့် ပြောဆိုခဲ့ခြင်း ဖြစ်သည်။ 

“ကလေးသူငယ်တွေကို ကူးသန်းရောင်းဝယ်ရေး လုပ်တယ်၊ ကျမတုိ့ရဲ့ အနာဂတ်ကို ကုန်ကူးတယ် ဆိုတာဟာ အင်မတန်မှ မလုပ်သင့်တဲ့ကိစ္စပါ။ ဒါဟာ လူသားမဆန်တဲ့အပြင် အင်မတန်မှ ပညာမဲ့တဲ့ကိစ္စ ဖြစ်ပါတယ်။ ကိုယ့်ရဲ့ အနာဂတ်နဲ့ လောင်းကစားလုပ်နေသလိုပါပဲ” ဟု လူထုခေါင်းဆောင် ဒေါ်အောင်ဆန်းစုကြည်က ပြောဆိုသည်။ 

အမျိုးသမီးနှင့် ကလေးများအား လူကုန်ကူးခြင်းအား ရာဇဝတ်မှုအဖြစ် သတ်မှတ်၍ နိုင်ငံတကာက ပူးပေါင်း တိုက်ဖျက်ရန်အတွက် ရည်ရွယ်သည့် ပါလာမိုစာချုပ် စတင်အသက်ဝင်သည့် ဒီဇင်ဘာလ ၁၂ ရက်နေ့ကို အစွဲပြု၍ ကလေးကူးသန်းရောင်းမှုဆန့်ကျင်ရေးနေ့အဖြစ် နိုင်ငံတကာက သတ်မှတ်ခဲ့ခြင်း ဖြစ်သည်။ 

ယင်းအထိမ်းအမှတ်ပွဲကို ထိုင်း-မြန်မာနယ်စပ် မဲ့ဆောက်မြို့ရှိ CDC ကျောင်းတွင် ပြုလုပ်ခြင်းဖြစ်ကာ ကျောင်းသား
ကျောင်းသူ၊ ဆရာဆရာမ၊ ကျောင်းသားမိဘများ၊ ဒီမိုကရေစီရေး လုပ်ဆောင်နေသည့် အဖွဲ့အစည်းများမှ တက်ရောက် ခဲ့ပြီး လူအင်အား ၂၀၀၀ ကျော်ရှိသည်။ 

ကလေးများအား ကူးသန်းရောင်းဝယ်ခြင်းအား ယနေ့မှတင်မဟုတ်ဘဲ နေ့တိုင်းနေ့တိုင်းအား ကလေး ကူးသန်း
ရောင်းဝယ်မှု ဆန့်ကျင်ရေး အဖြစ် သတ်မှတ်ရလည်း လူထုခေါင်းဆောင်က ဗီဒီယိုမိန့်ခွန်းမှ တိုက်တွန်းထားသည်။ 

“ကလေးတွေဟာ ရိုးရိုးလေးပြောရရင် သူတို့ကို မွေးပေးပါဆိုပြီးတော့ ဒီလောကကြီးထဲကို ရောက်လာတာ မဟုတ် ပါဘူး။ လူကြီးတွေက မွေးလိုက်လို့ ရောက်လာတာတဲ့ ကလေးလေးတွေ ဖြစ်ပါတယ်။ ဒါကြောင့်မို့လို့ ကျမတို့ လူကြီး
တွေ အားလုံးဟာ ကျမတို့ အနာဂတ်ဖြစ်တဲ့ ရင်သွေးလေးတွေအတွက် တာဝန်ရှိတယ်ဆိုတာ ကို နေ့တိုင်းနေ့တိုင်း သတိရပြီးတော့၊ နေ့တိုင်းနေ့တိုင်းဟာ ကလေးသူငယ်များ ကူးသန်းရောင်းဝယ်ရေး ဆန့်ကျင်ရေးနေ့ဆိုပြီးတော့ ကျမတို့ စွဲစွဲမြဲမြဲမှတ်ထားဖို့ လိုတယ်” ဟု လူထုခေါင်းဆောင်က ဆိုသည်။ 

မြန်မာနိုင်ငံတွင် လူကုန်ကူးမှု တိုက်ဖျက်ရေး နှစ်ပတ်လည်အစီရင်ခံစာအရ ၂ဝ၁၁ ဇွန်လအထိ လူကုန်ကူးမှု  ပေါင်း ၆၈ မှုရှိပြီး တရားခံ ၁၆ဝ ဦးကို ဖမ်းမိထားသည်ဟု သိရသည်။ 

မြန်မာနိုင်ငံ လူကုန်ကူးမှုတိုက်ဖျက်ရေးဆိုင်ရာ ၂ဝဝ၆-၂ဝ၁ဝ ငါးနှစ်စီမံကိန်းအတွင်း လူကုန်ကူးမှုပေါင်း ၃၂၆ မှုရှိခဲ့ပြီး အများဆုံးမှာ ရှမ်းပြည်မြောက်ပိုင်းနှင့် ရန်ကုန်တိုင်းတို့ ဖြစ်ကြောင်း လူကုန်ကူးမှု တားဆီးကာကွယ်ရေး ဗဟိုအဖွဲ့ ဒုရဲမှူးကြီး ရာလျှံမုန်းကို ကိုးကား၍ ပြည်တွင်းထုတ် 7 days ဂျာနယ်တွင် ပါရှိသည်။ ရန်ကုန်တိုင်းအတွင်း ၇၃ မှုသာ ရှိခဲ့ပြီး ရှမ်းပြည်မြောက်ပိုင်းတွင်မူ ၂၅၃ မှုထိ ရှိသည်။ 

ယခုကဲ့သို့ ကလေးကူးသန်းရောင်းဝယ်မှုမြင့်မားရခြင်းမှာ စားဝတ်နေရေးဆိုင်ရာ ပြဿနာကြောင့်ဟု Burma Act အဖွဲ့က သုံးသပ်ထားသည်။ Burma Act အဖွဲ့မှာ ကလေးသူငယ် ကူးသန်းရောင်းဝယ်မှု ပပျောက်ရေး အတွက် ပညာပေးလုပ်ငန်း လုပ်ဆောင်နေသည့် အဖွဲ့ဖြစ်သည်။ 

“စားဝတ်နေရေး အဆင်မပြေတော့ မိဘတွေ ကိုယ်တိုင်ကလည်း ရှာဖွေနေရတယ်။ ကလေးတွေ ကိုယ်တိုင်ကလည်း စားဝတ်နေရေး အဆင်မပြေတော့ အလုပ်လုပ် ပိုက်ဆံများများပေးရင် သူတို့ကိုယ်တိုင် လိုက်တာတွေ ရှိတယ်။
နောက်ပြီး ကလေးတွေ ရောင်းစားလို့ ရတယ်ဆိုတဲ့ အသိတွေကို ပြောင်းလဲ မပေးနိုင်ခဲ့ဘူး ။ ကလေးကို ရောင်းစား ရင် ပြစ်မှုမြောက်တယ်၊ ရာဇဝတ်မှု မြောက်တယ်ဆိုတာ သူတို့ မသိဘူး။ စာဝတ်နေရေး အဆင်မပြေတော့ သိဖို့ ခက်ခဲတဲ့ အခြေအနေပေါ့” ဟု Bumra  Act အဖွဲ့တာဝန်ခံ ဒေါ်နန်းမူက မဇ္ဈိမကို ပြောသည်။ 

မြန်မာနိုင်ငံမှ ကလေးငယ်များမှာ အိမ်နီးချင်းနိုင်ငံများသို့ နည်းအမျိုးမျိုးဖြင့် ကူးသန်းရောင်းဝယ်ခြင်း ခံနေရသည့် အပြင် ပြည်တွင်းတွင်လည်း တောမြို့မှ မြို့ကြီးများပေါ်သို့ အိမ်စေအဖြစ် ကူးသန်းခံနေရသည်။  ယင်းအပြင် အစိုးရစစ်တပ်များတွင်လည်း စစ်သားသစ်စုဆောင်းသည်ဟုဆိုကာ လိမ်ညာရောင်းချခံနေရခြင်း များလည်း ရှိသည်။ 

“တရုတ်နယ်စပ်မှာ မယားအဖြစ် ရောင်းစားတာ ရှိတယ်။ ထိုင်းဘက်မှာတော့ သူတောင်းစား လုပ်ခိုင်းတာ၊ ဘိန်းရောင်းခိုင်းတာ၊ ပြည့်တာဆန်လုပ်ငန်းတွေနဲ့ ကလေးတွေကို ပင်လယ်ထဲမှာ လွှတ်ပြီး ငါးဖမ်းလုပ်ငန်းတွေမှာ
ရောင်းစားခံရတာတွေရှိတယ်” ဟု ဒေါ်နန်းမူက ဆိုသည်။ 

ယင်းကဲ့သို့ ရောင်းချခံရသူများကို ကယ်ဆယ်ရမည့်အပြင် လွတ်မြောက်လာသူများကိုလည်း ပြန်လည် ထူထောင်ပေးရန်အတွက် လိုအပ်ကြောင်း လူထုခေါင်းဆောင်က သတိပေးထားသည်။ 

“ဒီကလေးတွေရဲ့ ဘဝတွေကို ပြန်လည်ထူထောင်ပေးဖို့ဆိုတာဟာလည်း အရေးကြီးတယ်ဆိုတာလည်း ကျမတို့
မေ့လို့မရပါဘူး။ ကူးသန်းရောင်းဝယ်ရေးကနေပြီးတော့ ကူညီပေးတယ်၊ မစပေးတယ်၊ ကယ်ထုတ် ပေးလိုက်ပြီးတဲ့ အခါကျရင် ဒီကလေးတွေဟာ သူတို့ရဲ့ အနာဂတ်ကို ပြန်လည်ပြီးတော့ ထူထောင်နိုင်ဖို့ ဆက်ပြီးတော့ အကူအညီ
တွေ အများကြီး လိုပါတယ်။ အဲဒါအတွက်လည်း ဝိုင်းဝန်းပြီးတော့ လုပ်ဆောင်ကြ ပါလို့ ကျမအနေနဲ့ သတိပေး ချင်ပါတယ်” ဟု လူထုခေါင်းဆောင် ဒေါ်အောင်ဆန်းစုကြည်က ဗီဒီယိုမိန့်ခွန်းမှ တဆင့် ပြောကြားခဲ့သည်။

ကရင်နီပြည်သူများ၏ အကျိုးဖြစ်ထွန်းမှုလုံလောက်စွာ ရရှိခံစားနိုင်စေရန်အတွက် ဂျပန်အစိုးရမှ မြန်မာအစိုးရအား တွန်းအားဆောင်ရွက်ပေးသွားရန် လိုအပ်သည်ဟု KNPP က ဆိုသည်။

ကရင်နီပြည်နယ်ရှိ လောပိတအမှတ်-၂  ရေအားလျှပ်စစ်စက်ရုံကို ပြန်လည်မွမ်းမံပါက စက်ရုံအနီးတ၀ိုက်တွင် နေထိုင်သည့် ကရင်နီပြည်သူများ၏ အကျိုးဖြစ်ထွန်းမှုလုံလောက်စွာ ရရှိခံစားနိုင်စေရန်အတွက် ဂျပန်အစိုးရမှ မြန်မာအစိုးရအား တွန်းအားဆောင်ရွက်ပေးသွားရန် လိုအပ်သည်ဟု KNPP က ဆိုသည်။

“အထူးသဖြင့် ဒီဒေသတ၀ိုက်မှာနေထိုင်တဲ့ လူထုတွေဟာ စက်ရုံတည်ဆောက်တုန်းက အဓိက ဆိုးကျိုးခံခဲ့ရတဲ့လူတွေဖြစ်တယ်။ ထွက်လာတဲ့ရလဒ်ကလည်းပဲ သူတို့က အဓိက ခံစားရမယ့်လူ ဖြစ်သင့်တာပေါ့။ ဒါပေမယ့် အဲသလို မဟုတ်ဘူးဗျ။ ကျနော်တို့ ကရင်နီပြည်သူတရပ်လုံးကလည်းပဲ မီးအလုံအလောက်ရတဲ့ အဆင့်မှာ မရှိဘူးဆိုတော့ ကျနော်တို့ အကျိုးခံစားခွင့်ဟာ ဒေသခံတွေမှာ ဘာမှ မရှိဘူး ဆိုတာကို ဂျပန်အစိုးရကိုပြန်ပြီး စဉ်းစားစေချင်တယ်” ဟု ကရင်နီအမျိုးသား တိုးတက်ရေးပါတီ KNPP မှ အတွင်းရေးမှူး-၁ ခူဦးရယ်က ပြောသည်။

လွန်ခဲ့သည့် ၂၀၀၃-၄၊ ၂၀၀၆ ခုနှစ်များက ဂျပန်အစိုးရမှ လူမှုရေးစာနာထောက်ထားသည့် အကူအညီဖြင့် လောပိတရေအားလျှပ်စစ် စက်ရုံကို ပြန်လည်မွမ်းမံခဲ့ပြီးဖြစ်သော်လည်း ယခုအခါတွင် စက်ရုံတခုလုံးအား ပြန်လည်မွမ်းမံရန် လိုအပ်နေပြီဖြစ်သည်။ သို့သော် ယခုတခါ ဂျပန်အစိုးရအနေဖြင့် လောပိတရေအားလျှပ်စစ်အား ပင်လယ်ရပ်ခြားဖွံ့ဖြိုးရေးအကူအညီ - Oversea Development Assistance အထောက်အပံ့ဖြင့် ပြန်လည်မွမ်းမံရန် ထောက်ပံ့ကူညီသွားမည်ဆိုပါက အကျိုးခံစားခွင့်ရှိသူများအရေးကို ထည့်သွင်းစဉ်းစားပေးရန် လိုသည်ဟု ဆိုသည်။

“စီမံကိန်းကြောင့် ဖြစ်ပေါ်လာမည့် ဆိုးကျိုးများကို ဦးစွာ ခံစားရမည့်သူများ ဖြစ်သကဲ့သို့ အကျိုးရလဒ်ကို ဦးစားပေးစံစားရမည့်သူများ ဖြစ်သည်ကို ဂျပန်အစိုးရနှင့် ဗမာအစိုးရတို့အနေဖြင့် သိရှိထားသင့်ပြီး ကူညီပံ့ပိုးမှုကို အလေးပေးစဉ်းစားပေးသင့်ပါကြောင်း မိမိတို့မှ အလေးအနက်ထား တောင်းဆိုအပ်ပါသည်” ဟု KNPP မှ နိုဝင်ဘာလ ၆ ရက်နေ့ဖြင့် ထုတ်ပြန်လိုက်သော ထုတ်ပြန်ကြေညာချက်တွင် ဖော်ပြထားသည်။

ဂျပန်အစိုးရမှ လောပိတရေအားလျှပ်စစ်စက်ရုံအား ပြန်လည်ပြုပြင်မွမ်းမံသွားမည့် လုပ်ငန်းစဉ်ကို မကန့်ကွက်သော်လည်း ရရှိလာသည့် အကျိုးကျေးဇူးများကို ကရင်နီပြည်သူများအနေနှင့် မျှဝေခံစားခွင့်ရရှိရန် မြန်မာအစိုးရကို ဖိအားပေးသည့်သဘောသာဖြစ်သည်ဟု ပြောသည်။

လောပိတ ရေအားလျှပ်စစ်စက်ရုံ စီမံကိန်းစတင်တည်ဆောက်ခဲ့စဉ်က ဒေသခံကရင်နီပြည်သူ ၁၂၀၀၀ ကျော်တို့သည် မိမိတို့ နေရပ်ရင်းမှ အတင်းအဓမ္မ ပြောင်းရွှေ့ခြင်း ခံခဲ့ကြရသည်။ မြန်မာအစိုးရမှ စီမံကိန်းလုံခြုံရေးကို အကြောင်းပြချက်ဖြင့် တပ်အင်အားများ တိုးချဲ့ချထားခဲ့ပြီး ရေအားလျှပ်စစ်စက်ရုံနှင့် မြန်မာပြည်သို့ သွယ်တန်းထားသည့် လျှပ်စစ်ဓါတ်အားတာဝါတိုင်များ၏ လုံခြုံရေးတို့အတွက် မြေမြှုပ်မိုင်း အလုံးပေါင်း ၁၈၀၀၀ ခန့် ထောင်ထားခဲ့သည်ဟု နိုဝင်ဘာလ-၂ ရက်နေ့က ကရင်နီဖွံ့ဖြိုးတိုးတက်ရေး သုတေသနအဖွဲ့ KDRG မှ ထုတ်ပြန်လိုက်သည့် ကြေညာချက်ထဲတွင် ဖော်ပြထားသည်။

“ဒီနေ့အထိ လောပိတ အနီးတ၀ိုက်မှာ မြေမြုပ်မိုင်းတွေ ရှိနေတုန်းပါပဲ” ဟု KDRG တာဝန်ခံ ခူတော်ရယ်က ပြောသည်။

ပြီးခဲ့သည့် အောက်တိုဘာလ ၂၁ ရက်နေ့က ဂျပန်အစိုးရနှင့် မြန်မာအစိုးရတို့၏ နှစ်နိုင်ငံ၊နိုင်ငံခြားရေးဝန်ကြီးများ တွေ့ဆုံခဲ့ကြစဉ်က ကရင်နီပြည်နယ် လောပိတအရပ်တွင် တည်ဆောက်ထားသည့် အဆိုပါ ရေအားလျှပ်စစ်စက်ရုံအား အိုဒီအေ အကူအညီဖြင့် ပြန်လည်ပြုပြင်တည်ဆောက်ရန် သဘောတူခဲ့ကြသည်။

မြန်မာပြည်၏ ဆိုးဝါးလှသော လူ့အခွင့်အရေးချိုးဖောက်မှုများဖြစ်ပေါ်နေခဲ့သည့်အတွက် ဂျပန်အစိုးရမှ မြန်မာပြည်အား ပေးနေသည့် အိုဒီအေအထောက်အပံ့ကို ၁၂နှစ်ခန့် ရပ်တန့်ထားပြီးမှ ယခုတခါ ပြန်လည်ပေးသွားရန် ပြင်ဆင်ခဲ့ခြင်းဖြစ်သည်။

လောပိတ ရေအားလျှပ်စစ် စက်ရုံကို ၁၉၆၀ ခုနှစ်အနှောင်းပိုင်းတွင် ဒုတိယကမ္ဘာစစ်အတွင်း မြန်မာပြည်အပေါ် တင်ရှိနေသည့် စစ်လျော်ကြေးဖြင့် ဂျပန်အစိုးရ၏ အကူအညီနှင့် စတင်တည်ဆောက်လုပ်ခဲ့ခြင်းဖြစ်ပြီး ၁၆၈ မီဂါဝပ်ရှိ လျှပ်စစ်ဓါတ်အားကို ထုတ်လုပ်ပေးလျက်ရှိသည်။

ကရင်နီပြည်နယ်တွင် လောပိတ ရေအားလျှပ်စစ် စက်ရုံ အမှတ်-၁နှင့် အမှတ်-၂ ဟူ၍ရှိသော်လည်း အဆိုပါစက်ရုံမှ ထွက်ရှိသော လျှပ်စစ်ဓါတ်အားအများစုကို မြန်မာပြည်ရှိ ရန်ကုန်မြို့နှင့် မန္တလေးမြို့အပြင် အစိုးရလုပ်ငန်းစက်မှုဇုံနယ်များတွင်သာ အဓိက ပို့ဆောင်အသုံးပြုနေပြီး ဒေသခံကရင်နီပြည်သူ ၈၀ ရာခိုင်နှုန်းမှာ ယနေ့တိုင် လျှပ်စစ်မီးများ ရရှိခံစားရခြင်းမရှိကြသေးကြောင်း သိရသည်။

မြန်မာစစ်သားတွေအသတ်ခံရ

 

အပြည်ပြည်ဆိုင်ရာ မြစ်ကြောင်းတွင်း ပူးတွဲကင်းလှည့်တပ်ဖွဲ့ ကင်းလှည့်နေတုန်း မဲခေါင်မြစ်တွင်းမှာ လက်နက်ကိုင် တပ် ဖွဲ့တဖွဲ့နဲ့ တိုက်ပွဲဖြစ်ပွားပြီး မြန်မာစစ်သား ၃ ဦး အသတ်ခံရတယ်လို့ လုံခြုံရေးဆိုင်ရာ သတင်းရပ်ကွက်က ဆိုပါတယ်။ မြန်မာ၊ လာအို ပူးတွဲကင်းလှည့်တပ်ဖွဲ့ဟာ နော်ခမ်းခေါင်းဆောင်တယ်လို့ ယုံကြည်ရတဲ့ အဖွဲ့နဲ့ မနေ့က ရွှေတြိဂံဒေသ မြောက်ဘက် ကီလိုမီတာ ၂၀လောက်မှာ ရှိတဲ့ ဘန့်ဒုံဆမ်ပု အရပ်မှာ တိုက်ပွဲဖြစ်ပွားခဲ့ပါတယ်။ အောက်တို ဘာလ ၅ ရက်က အဲဒီနားမှာပဲ တရုတ်သင်္ဘောသား ၁၃ ယောက် အသတ်ခံခဲ့ရပါသေးတယ်။

မဲခေါင်မြစ်ကြောင်းတလျှောက် လုံခြုံရေးပေးဖို့ တပ်ဖြန့်ထားတဲ့ မြန်မာနဲ့ လာအိုစစ်သားတွေနဲ့အတူ လုံခြုံရေးပူးတွဲ ယူ တဲ့အနေနဲ့ ယူနန်ပြည်နယ်၊ ကွမ်းလေဆိပ်ကမ်းကနေ ချင်းရိုင်းနယ်၊ ချင်းဆန်ဆိပ်ကမ်းကို ခုတ်မောင်းလာတဲ့ ပုဂ္ဂလိက ကုန်တင်သင်္ဘော ၉စင်း စောင့်ရှောက်ပေးဖို့ မော်တော်ဘုတ် ၁၁စင်းနဲ့အတူ လက်နက်ကိုင်ရဲတွေကို တရုတ်က ပို့ပေး ခဲ့ချိန်မှာ ဒီတိုက်ပွဲတွေ ဖြစ်ပွားခဲ့တာပါ။ တရုတ်ပြည်က သူတို့ သင်္ဘောသာတွေသေဆုံးပြီးနောက်မှာ မြန်မာ၊ လာအို၊ ထိုင်းနဲ့ပူးတွဲဆောင်ရွက်ဖို့အတွက် မဲခေါင်မြစ်အတွင်းကင်းလှည့်ဖို့ မော်တော်ဘုတ်တွေနဲ့အတူ လက်နက်ကိုင်ရဲ အင်အား ၃၀၀ ကျော် ကို တပ်ဖြန့်ထားပါတယ်။

တရုတ်ပြည် ကွမ်းလေဆိပ်ကမ်းကနေ ရွှေတြိဂံထိ သွားလာတဲ့ မြစ်ကြောင်း ကင်းလှည့်တပ်ဖွဲ့နဲ့အတူ ထိုင်းအာဏာပိုင် တွေက ပူးပေါင်းဆောင်ရွက်မှာဖြစ်ပြီး သူတို့တာဝန်ကတော့ ရွှေတြိဂံကနေ ချင်းဆန်ဆိပ်ကမ်းထိ ကင်းလှည့်ဖို့ တဦး တည်း တာဝန်ယူရမှာ ဖြစ်ပါတယ်။ တရုတ်သင်္ဘောသား ၁၃ ယောက်ဟာ တရုတ်နယ်စပ်တောင်ပိုင်း၊ မြစ်ကြောင်းပိုင်းမှာ အသတ်ခံရတာဖြစ်ပြီး တရုတ်က မူးယစ်ဆေးဝါး စစ်ပွဲ တွေနဲ့မှောင်ခိုလုပ်ငန်းတွေနဲ့ပြည့်နေတဲ့ ဒီဒေသကို ဖြတ်ပြီး တောင်ပိုင်းကိုသွားနေတဲ့ သင်္ဘောသားတွေနဲ့ကုန်တင် သင်္ဘောတွေ ဘေးကင်လုံခြုံရေးအတွက် စိုးရိမ်ပူပန်နေပါတယ်။

ဒီတရုတ်သင်္ဘောသားတွေ အသတ်ခံရမှုနဲ့ ထိုင်းရဲတွေက စစ်သား ၉ ဦးကို ဖမ်းထားပါတယ်။ ထိုင်း၊ အမှတ် ၃ တပ်တော် ရဲ့ ဖမောန်အထူးတပ်ဖွဲ့မှာ တွဲဖက်ထားတဲ့ အရာရှိ ၉ယောက်ကို လူသတ်မှုနဲ့ တရားစွဲဆိုထားပါတယ်။ သူတို့ကတော့ ဒီ စွဲဆိုချက်ကို ငြင်းပယ်ပြီး နော်ခမ်းခေါင်း ဆောင်တဲ့ ဗမာပြည်၊ ရှမ်းပြည်နယ်က မူးယစ်ဆေးဝါးကူးသန်းရောင်းဝယ်နေတဲ့ ဂိုဏ်းမှာ တာဝန်ရှိတယ်လို့ ထုတ်ဖော် ပြောဆိုပါတယ်။ ကနဦးထွက်ဆိုချက်မှာ သူတို့မဲခေါင်မြစ်ကြောင်းထဲ ၀င်တဲ့အချိန် မှာ အရာရှိ ၉ ဦးက ဟွာဖင်းနဲ့ ယုရှင်း သင်္ဘော ၈စင်းကို ကြားဖြတ်ဖမ်းဆီးခဲ့တယ်။ သင်္ဘောပေါ်မှာ မြင်းဆေး (ယာဘ) အလုံးပေါင်း ၉၂၀,၀၀၀ တွေ့ခဲ့တယ်။ ရေထဲမှာ သင်္ဘောသားတွေရဲ့အလောင်းတွေတွေ့တော့ စစ်သားတွေဟာ လူသတ် သမားတွေအဖြစ် သံသယ ဖြစ်ခံရသူတွေ ဖြစ်လာတာ ဖြစ်တယ်လို့ ဆိုပါတယ်။ စစ်သား ၉ ယောက်အပေါ် စွဲဆိုထားတဲ့ အမှုကို  စဉ်းစားပေးဖို့အတွက် အရှေ့နေချုပ်ရုံးကို အခု တင်ပြထားပါတယ်လို့ အမှတ် (၅) ရဲတိုင်း၊ ဒုတိယ အကြီးအကဲ ရဲ ဗိုလ်ချုပ် ဆစ်သီပေါန်ဆရီချန်ထာ့ပ် က မနေ့က ပြောပါတယ်။ ဒီအမှုကို စုံစမ်းစစ်ဆေးဖို့ ရှေ့နေတွေနဲ့ ရဲတွေပါတဲ့ အ ဖွဲ့တဖွဲ့ကို ဖွဲ့စည်းထားပါတယ်လို့ ရဲဗိုလ်ချုပ် ဆစ်သီပေါန်က ပြောပါတယ်။ စုံစမ်းစစ်ဆေးသူတွေအနေနဲ့ နိုင်ငံခြားက သက်သေ တွေကို မေးမြန်းဖို့ လိုနေတုန်းပါပဲလို့ သူက ပြောပါတယ်။

ဒုက္ခသည် ၄၅၀၀ ကျော်သည် အစားအစာ၊ ရေနှင့် ဆေးဝါး အကူအညီများ အရေးပေါ် လိုအပ်နေကြောင်း ဒုက္ခသည်များပြောသည်။

ကချင်ပြည်နယ် အရှေ့ဘက် တရုတ်နယ်စပ်တစ်လျှောက် ကန်ပိုင်တီနှင့် ဒဘက်ချောင်းကြား နယ်ခြားမှတ်တိုင် ၅ နှင့် ၁၄ ကြားရှိ ဒုက္ခသည် ၄၅၀၀ ကျော်သည် အစားအစာ၊ ရေနှင့် ဆေးဝါး အကူအညီများ အရေးပေါ် လိုအပ်နေကြောင်း ဒုက္ခသည်များပြောသည်။

“မြစ်ကြီးနားမြို့ ဗန်းမော်ဘက်တော့ အဆင်ပြေတယ်လို့ကြားတယ်။ ကျွန်တော်တို့ကတော့ ချောင်မှာဆိုတော့ ဒီကနေထပ်ပြေးဖို့လည်းမရှိတော့၊ ခုလောလောဆယ်က စောင့်နေရုံပဲရှိတယ်။ ဆန်ကတော့ ရှန်လောတ် (KIO)တွေကပေးနေတာ၊ ဆန်တမျိုးထဲကိုတော့ အချိန်မှီ စားနိုင်အောင်စီစဉ်ပေးတယ်။ ကျန်တာကတော့ ကိုယ့်အစီအစဉ်နဲ့ကိုယ် ရှာစားတယ်။ ကျွန်တော်တို့က ဆရာတွေဆိုတော့ ကျွေးတာနဲ့ အသက်ဆက် ရှင်သန်နေကြတယ်။” ဟု နယ်ခြားမှတ်တိုင် ၁၃နှင့် ၁၄ ကြားရောက်ရှိနေသူ ခရစ်ယာန်ဓမ္မဆရာတစ်ဦးပြော သည်။

နယ်ခြားမှတ်တိုင် ၅ နှင့် ၆ ကြားတွင် ဒုက္ခသည် ၁၀၀ ကျော်၊ နယ်ခြားမှတ်တိုင် ၇ နှင့် ၈ ကြားတွင် ဒုက္ခသည် ၆၀၀ ကျော်၊ နယ်ခြားမှတ်တိုင် ၁၀ တွင် ဒုက္ခသည် ၁၀၀၀ ကျော်နှင့် နယ်ခြားမှတ်တိုင် ၁၃ နှင့် ၁၄ ကြားတွင် ဒုက္ခသည် ၂၆၀၀ ကျော် ရှိသည်ဟု သိရသည်။

ဝိုင်းမော်မြို့နယ်အတွင်းမှ ထိုဒုက္ခသည် ပေါင်း ၄၅၀၀ ကျော်သည် နိုဝင်ဘာလဆန်းပိုင်းမှ ထိုနေရာသို့ရောက်ရှိ၍ ယခုချိန်ထိ ကချင်လွတ်မြောက်ရေးအဖွဲ့ (KIO) က ထောက်ပံ့သောဆန် (လူတဦးလျှင်တနေ့ ဆန်နို့ဆီ ၂ ဗူးနှုန်း)ကို အဓိက မှီခိုနေရသည်ဟု ဆိုသည်။

“အာလူးတောင်မစားနိုင်တော့ဘူး၊ အသားကတော့မပြောနဲ့တော့။ ကြာလာရင်တော့ ဒုက္ခရောက်ဖို့ပဲ။ ဘာမှ စိုက်ပျိုးလို့မရဘူး။ ခဏတဖြုတ်တော့ နေလို့ရတယ်။” ဟု ဆက်ဆိုသည်။

ထိုနယ်စပ် စခန်း ၄ ခုသည် တခုနှင့် တခုကြားတောင်ပေါ်ခရီးကို ဆိုင်ကယ်ဖြင့်သွားလျင် ၄ နာရီကြာ၍ မြောက်ဘက်အကျဆုံး မှတ်တိုင် ၅ နှင့် ၆ ကြားရှိစခန်းသည် အအေးဆုံးနှင့် စားဝတ်နေရေး အခက်ဆုံးဖြစ်သည်ဟု ပြောသည်။

“NGO တွေလာဖို့ရှိမယ်လို့တော့ထင်တယ်။ ကျွန်တော်တို့ ရောက်တာတော့ တလရှိပြီ။ လာရောက်လည်ပတ်ပြီးခွန်အားပေးကြပါ” ဟု  မှတ်တိုင် ၁၃ နှင့် ၁၄ ကြား ရောက်ရှိနေသူ ဆရာတဦးပြောသည်။

တရုတ်နိုင်ငံတွင် နေထိုင်သည့်ကချင်လူမျိုးများ လာရောက်လှူဒါန်းမှု အချို့ရှိသည်သော်လည်း နိုင်ငံတကာအဖွဲ့အစည်းများမှ အကူအညီမရရှိဟု သိရသည်။

ထိုဒုက္ခသည်စခန်းများအတွက် တစ်ခုတည်းသောဆေးပေးခန်းမှာ ဇိုင်းအောင်စခန်းအနီး မုန်ဂါဇွပ်ရှိ ကချင်နှစ်ခြင်းခရစ်ယာန်အသင်းချုပ်မှ ဖွဲ့လှစ်ထားသောဆေးခန်းငယ်တစ်ခုဖြစ်ပြီး ကိရိယာတန်ဆာပလာမပြည့်စုံဘဲ ဆေးဝါးများသည် စားပွဲခုံတလုံးပေါ်တွင် တင်ထားသမျှသာဖြစ်သည်ဟု ဆိုသည်။

“အဆင်မပြေတဲ့နေရာမှာ ဒုတိယလိုက်တာက သောက်ရေ၊ ရေက အောက်ဘက်မှာ သေးသေးလေး။ လူက ရာချီပြီးခပ်သောက်၊ အဲမှာ အချင်းချင်းပြန်တိုး၊ တိုက်ကြ။  ရေတခါ ခပ်နိုင်ဖို့အရေး နာရီိပိုင်းနဲ့စောင့်ရတာ။” ဟု သောက်ရေသုံးရေ အခက်အခဲကို ဇိုင်းအောင်စခန်းမှ ကချင်သတင်းဌာနသို့ ပြောသည်။

ယခုချိန် ထိုဒုက္ခသည်စခန်းများသို့ ၀ိုင်းမော်မြို့နယ်အတွင်းမှ နေရပ်စွန့်ခွာထွက်ပြေးလာကြသူများ ရောက်လာနေကြဆဲဖြစ်သည်ဟု ဆိုသည်။

ရှမ်းပြည်မြောက်ပိုင်းနှင့် ကချင်ပြည်နယ်တွင် ၆ လကျော်ကြာ မြန်မာအစိုးရတပ်နှင့် KIO ကြား တိုက်ပွဲများကြောင့် နေရပ်စွန့်ခွာထွက်ပြေးကြသူများ ၅၀၀၀၀ ကျော်ပြီဟု WPN မှ ပြောသည်။

စင်္ကာပူရောက် မြန်မာ အမျိုးသမီး တစ်ဦးလို့ ယူဆရသူ တစ်ဦးဟာ ယဉ်များအလွန် ကြပ်လေ့ရှိတဲ့ လမ်းပေါ်သို့ မိုးပျံလမ်းပေါ်မှ ခုန်ချခဲ့တာကြောင့်

စင်္ကာပူရောက် မြန်မာ အမျိုးသမီး တစ်ဦးလို့ ယူဆရသူ တစ်ဦးဟာ ယဉ်များအလွန် ကြပ်လေ့ရှိတဲ့ လမ်းပေါ်သို့ မိုးပျံလမ်းပေါ်မှ ခုန်ချခဲ့တာကြောင့် အခုဆေးရုံ တင်ထားရကြောင်း စင်္ကာပူ သတင်းစာ တစ်စောင်မှာ ဖော်ပြထားပါတယ်။ မိုးပျံလမ်း Kallang-Paya Lebar နှင့် the Pan-Island အဝေးပြေးလမ်း Sims လမ်းမကြီးတို့ ဆုံရာနေရာသို့ ခုန်ချခဲ့တာဖြစ်ပြီး မြန်မာနိုင်ငံမှ စင်္ကာပူနိုင်ငံသို့ အိမ်ပေါ်လုပ်နေသူ တစ်ဦး ဖြစ်မည်လို့ ခန့်မှန်းရပါတယ်။ ယင်းမိန်းကလေးဟာ ခုန်မချခင် Katong Shopping Centre ရှိ အိမ်အကူအလုပ်သမား ရှာဖွေပေးရေး အေဂျင်စီမှ ထွက်ပြေး လာတာဖြစ်ပါတယ်။ မျက်မြင်များ၏ ပြောပြချက်အရ သူမဟာ မိုးပျံလမ်းရဲ့ အစွန်းက ပန်းခင်းပေါ်မှာ မက်တက်ရပ်ပြီး လက်တွေကို ဆန့်တန်းကာ အောက်ကို ခုန်ချတာလို့ သိရပါတယ်။

တက်စီမောင်းသူ တစ်ဦးမှ မိန်းကလေးကို လမ်းဘေးဖယ်ပြီး ရဲတပ်ဖွဲ့ကို အကြောင်းကြားခဲ့ပါတယ်။ ၎င်းအမျိူး သမီးဟာ ပြုတ်ကျလာတဲ့ အချိန်မှာ သစ်ကိုင်း တစ်ကိုင်းပေါ်ကို တစ်ဆင့်ပြုတ်ကျပြီး သစ်ကိုင်းလည်း ကျိုးကျခဲ့ပါတယ်။ သစ်ကိုင်းပေါ်က တဆင့် ကျလာခဲ့တဲ့အတွက် အရှိန်အနဲငယ်ကို လျော့ပါးသွားစေခဲ့ပါတယ်။ သူဟာ လမ်းမဘေးက ကားတွေ လမ်းမကြီးပေါ်ကနေ အရေးပေါ်ဘေး ထိုးထားဖို့ နေရာလေးပေါ်ကို ပြုတ်ကျလာပြီး ညာဖက်လက်နဲ့ ဘယ်ဖက်ခြေထောက် ကျိုးသွားခဲ့ပါတယ်။ Tan Tock Seng ဆေးရုံကို သယ်ဆောင်သွားတဲ့အချိန်မှာ သူဟာ ဝေဒနာများ ခံစားနေရသော်လည်း သတိတော့ကောင်းစွာ ရနေခဲ့ပါတယ်။ သူ့ကိုအခု အရေးပေါ်ဆောင်မှာ ထားပြီး လုံးဝလှုပ် ရှားခွင့် မပေးထားပါဘူး။

အဲဒီလို မလုပ်ခင်မှာ သူဟာ သူ့ကိုယ်သူ အဆုံးစီရင်ချင်တယ်ဆိုတဲ့ အကြောင်းကို တစ်ခြား အိမ်အကူ အမျိုးသမီးတွေကို ပြောပြခဲ့ တယ်လို့သိရပါတယ်။ ဘာကြောင့်အဲသည် လိုဆန္ဒရှိနေတယ် ဆိုတာကိုတော့ မပြောခဲ့ပါဘူး။

စင်္ကာပူနိုင်ငံမှာ မြန်မာမိန်းကလေးများ အမြင့်မှ ခုန်ချပြီး သေကြောင်းကြံမှုဟာ အစဉ်အလာ တစ်ခုလို ဖြစ်လာနေပြီး မခိုင်သင်ဇာ နှင့် မယဉ်ငြိမ်းပွင့် ပြီးလျှင် ယခုမိန်းကလေးမှာ တတိယမြောက်ဖြစ်ပါတယ်။

ပြည်ထောင်စုတိုင်းရင်းသားများပညာရေးရန်ပုံငွေဂီတပွဲတော်ရက်ရွှေဆိုင်း

။ ‘ပြည်ထောင်စု တိုင်းရင်းသားများ ပညာရေး ရန်ပုံငွေ ဂီတပွဲနှင့် ဈေးရောင်းပွဲတော်’ကို ရန်ကုန်မြို့ သုဝဏ္ဏ အားကစားကွင်း၌ ဒီဇင်ဘာလ ၁၅ ရက်နေ့တွင် ကျင်းပရန် ကြေငြာထားသော်လည်း ပွဲမိန့် မရသဖြင့် ကျင်းပမည့်ရက်အား ဒီဇင်ဘာလ နောက်ဆုံးအပါတ်သို့ ရွှေ့ဆိုင်းလိုက်ကြောင်း ပွဲဖြစ်မြောက်ရေး
ကော်မတီက ပြောသည်။ 

“သေချာကတော့ ၁၅ ရက်နေ့မှာ မလုပ်နိုင်တော့ဘူး။ နောက်ထပ် မရွှေ့ရအောင် ရက်ကို ကျနော်တို့ ညှိနေတုန်းပါ။ ပွဲခွင့်ပြုမိန့်ကိစ္စကို ကြိုးစားရင်းက ရက်ရွှေ့ရတာပါ” ဟု   ပွဲဖြစ်မြောက်ရေး ကော်မတီ ပြန်ကြားရေးမှူး ဦးအုန်းကြိုင် က ပြောသည်။ ရန်ပုံငွေ ဂီတပွဲကျင်းပမည့် နေ့ရက်၊ အချိန်နှင့်နေရာတို့ကို ပြန်လည် သတ်မှတ်ကာ ကြေငြာပေး မည်ဟု ဆိုသည်။

ယင်းရန်ပုံငွေ ဖျော်ဖြေပွဲကို အမျိုးသား ဒီမိုကရေစီ အဖွဲ့ချုပ် NLD ၊ ပညာရေးကွန်ယက် အဖွဲ့များနှင့် အနုပညာရှင် များက ပူးပေါင်းစီစဉ်ကြခြင်း ဖြစ်သည်။

အတိုက်အခံခေါင်းဆောင် ဒေါ်အောင်ဆန်းစုကြည်နှင့် ဂီတတေးသံရှင် ၅၀ ကျော်တို့ သောကြာနေ့ နိုဝင်ဘာ ၂၅ ရက်နေ့ ညနေ ၃ နာရီကတွေဆုံစဉ်

ဂီတပွဲကို ဒီဇင်ဘာလ ၁၅ ရက်နေ့ ညနေ ၃ နာရီမှ ည ၁၀ နာရီအထိ ပြုလုပ်ရန်အတွက်  အားကစားကွင်း တာဝန် ရှိသူများနှင့် ကြိုတင် ညှိနှိုင်းရယူခဲ့သော်လည်း အားကစားကွင်း မအားလပ်သဖြင့် ပွဲအစီအစဉ်များ ဖျက်သိမ်းပေးရန်  ဒီဇင်္ဘာလ ၉ ရက်နေ့က ပွဲဖြစ်မြောက်ရေးကော်မတီထံ အားကစားကွင်း တာဝန်ရှိသူများက ဆက်သွယ် ပြောဆို ခဲ့ခြင်း ဖြစ်သည်။

ရန်ကုန်တိုင်း အစိုးရထံသို့လည်း လိုအပ်သည့် အထောက်အထား အပြည့်အစုံဖြင့် ပွဲကျင်းပခွင့် အတွက် ဒီဇင်ဘာလ ၂ ရက်နေ့က လျှောက်ထားခဲ့ပြီး ဖြစ်သော်လည်း ယနေ့အချိန်ထိ တစုံတရာ အကြောင်းပြန်ခြင်း မရှိသေးပေ။ 

NLD ဦးစီးကျင်းပသော ပြည်ထောင်စု တိုင်းရင်းသားများ ပညာရေး ရန်ပုံငွေ ဂီတဖျော်ဖြေပွဲနှင့် ဈေးရောင်းပွဲတော်မှာ ပွဲမိန့်မရသဖြင့် ရက်ပြောင်းရွှေ့ သတ်မှတ်ရ (ဓါတ်ပုံ /nldburma.org)

“အနုပညာရှင်တွေက ကျနော်တို့ကို ကူညီရတာဆိုတော့ သူတို့ မအားတဲ့ကြားက အချိန်တွေ ပြန်ညှိရတယ်။ ရက်ရွှေ့လိုက်တော့ ရောင်းထားတဲ့ လက်မှတ်တွေအတွက်လည်း ပြန်တောင်းပန်ပြီး ဒီဇင်ဘာ နောက်ဆုံးပတ်ထဲမှာ လုပ်မယ်ဆိုပြီး ပြောပြနေရတယ်” ဟု ပွဲဖြစ်မြောက်ရေးကော်မတီ အတွင်းရေးမှူး ဦးဖြိုးမင်းသိန်းက ပြောသည်။ 

နိုဝင်ဘာလ ၂၅ ရက်နေ့တွင် ဒေါ်အောင်ဆန်းစုကြည်နှင့် ဂီတအနုပညာရှင်များ တက္ကသိုလ်ရိပ်သာလမ်းရှိ
ဒေါ်အောင်ဆန်းစုကြည် နေအိမ်တွင် တွေ့ဆုံခဲ့ကြပြီး တိုင်းရင်းသားများ ပညာရေးအတွက် ကူညီရန် ဂီတရန်ပုံငွေပွဲ ကို စီစဉ်ခဲ့ကြခြင်း ဖြစ်သည်။

အဆိုပါဖျော်ဖြေပွဲတွင် Emperor ၊ Metalzone ၊ Lazy Club ၊ Big Bag ၊  Plus 3 ၊ Spectrum ၊ Reason ၊ Wanted ၊ Vertical Vibration ၊ The Tree အစရှိသည့် တီဝိုင်းများ နှင့်အတူ နာမည်ကျော် ဂီတ အနုပညာရှင် ၅၀ ကျော်က
မေတ္တာဖြင့် ကူညီသီဆိုကြမည် ဖြစ်သည်။

ပွဲလက်မှတ် ဈေးနှုန်များမှာ ကျပ် ငါးထောင်မှ ကျပ်သုံးသောင်းအထိ ရှိပြီး ကြိုတင်လတ်မှတ် ရောင်းချထားရာ ကျပ် ၁၅ သိန်းခန့် ရရှိထားသည်ဟု ပွဲဖြစ်မြောက်ရေးကော်မတီက ပြောသည်။

ဂီတလောကသားတွေရဲ့ပြသနာဘယ်တော့ရှင်းပေးနိုင်မလဲ

ဂီတလောကသားတွေရဲ့ မကျေလည်မှု ဘယ်တော့ရှင်းပေးနိုင်မလဲ
ဘက်ပေါင်းစုံက ပွင့်လင်း မြင်သာမှုတွေ ရှိလာပြီဆိုတဲ့ လက်ရှိအစိုးရလက်ထပ်မှာ ရုပ်ရှင်လောကသားတွေကတော့ ရုပ်ရှင်အစည်းအရုံးက တာဝန်ရှိသူတွေနဲ့အတူ  ရုပ်ရှင်ဆင်ဆာ မူဝါဒနဲ့ ပတ်သက်လို့ ဆွေးနွေးညှိနှိုင်းခဲ့ကြပြီး ဖြစ်ပါတယ်။

အဆိုတော် သားစိုး

ဒါပေမယ့် ဂီတလောကသားတွေ အကြားမှာတော့ မကျေလည်တဲ့ အသံတွေ ကြားနေရဆဲဖြစ်ပါတယ်။

ဂီတအစည်းအရုံးကနေပြီး ဂီတသမားတွေ ဖန်တီးသီဆိုထားတဲ့ တေးသီချင်းတွေကို ဘယ်နေရာမှာမဆို စီးပွားရေးအရ သုံးစွဲခွင့်နဲ့ ပတ်သက်လို့ အလွှာလိုက် ပေးဆောင် အသုံးပြုကြမယ် ဆိုပေမယ့် အဲဒီကိစ္စကို ဘာမှ ဆောင်ရွက်မပေးမှုအပေါ် အဆိုတော် သားစိုးနဲ့ ဂီတ လောကသား တချို့က အကောင်းဆုံး ဆောင်ရွက်ပေးနိုင်ဖို့ မျှော်လင့်နေကြတယ်လို့ သိရပါတယ်။

“သီချင်းတွေကို အလွှာလိုက် ဆောင်ရွက်ပေးမယ်ဆိုပြီး ဖြစ်မလာတာ ကျနော်တယောက်တည်းတင်မဟုတ်ဘူး။ တခြားဂီတသမားတွေလည်း အဲဒီကိစ္စကို သိချင်နေကြတယ်။ ဂီတအစည်းအရုံးအနေနဲ့ ဒီကိစ္စကို ဖြေရှင်းပေး စေချင်ပါတယ်” လို့ သားစိုးက ပြောပါတယ်။

ဂီတအစည်းအရုံးအနေနဲ့ သီချင်းတပုဒ်ကို စီးပွားရေးအရ အသုံးပြုတော့မယ်ဆိုတာနဲ့ ရေး၊ ဆို၊ တီး၊ အသံဖမ်း၊ ဖြန့်ချိစသဖြင့် အလွှာ အသီးသီးအလိုက်ကို သတ်မှတ်ထားတဲ့ နှုန်းထားအတိုင်းပေးဆောင် အသုံးပြုရမယ်ဆိုပြီး သတ်မှတ်ပေးထားခဲ့တာပါ။

“၂၀၀၉ ခုနှစ် နှစ်ကုန်တုန်းကပဲ FM တွေက ကျနော့်သီချင်းကို ထုတ်လွှင့်ခအဖြစ် တနှစ်လုံးစာ အတွက် ကျပ် ၈၀၀၀ ပေးဖူးပါတယ်။ အဲဒီကစပြီး မရလိုက်တာ အခု ၂၀၁၁ နှစ်ကုန်အထိပါပဲ” လို့ သူက ဆိုပါတယ်။

ပြည်တွင်းထုတ် ဂျာနယ်တွေမှာတော့ ဂီတအစည်းအရုံးက FM ရေဒီယိုတွေမှာ တေးသီချင်း သုံးစွဲမယ်ဆိုရင် သုံးစွဲခအဖြစ် မည်ရွေ့ မည်မျှ ပေးဆောင်သုံးစွဲမယ် ဆိုတာကို ဂီတအစည်းအရုံးအနေနဲ့ ဖြေရှင်း ညှိနှိုင်းမှုတွေ ပြုလုပ်နေတယ်လို့ ရေးထားတာ တွေ့ရပေမယ့်လည်း ယခုလက်ရှိမှာတော့ အဆိုတော်သားစိုးက FM အသံလွှင့်ဌာနတွေ၊ ပြည်တွင်း ရုပ်သံဌာနတွေက သူတို့ရဲ့ တေးသီချင်းတွေကို အသိပေးခြင်းမရှိဘဲ သုံးချင်သလို အသုံးပြုတယ်လို့ ပြောနေပါပြီ။

“FM တွေ အပါအဝင် MRTV 4 တို့ Sky Net တို့လို တီဗီ Channelတွေ က သီချင်းတွေကို ကျနော်တို့ဆီက ၀ယ်ပြီးလွှင့်ရမှာကို လွှင့်ချင်သလို လွှင့်ပြီးမှ ဂီတ အစည်းအရုံးကို လာပြီးရှင်းတယ်။ ပြောင်းပြန်ဖြစ်နေပါတယ်” လို့ သားစိုးက ဆိုပါတယ်။

City FM (ရန်ကုန်) စတင် တည်ထောင်ကာစ အချိန်ကလည်း တေးသီချင်းတွေကို ဖန်တီးသီဆိုသူတွေကို အသိမပေးဘဲ သုံးစွဲခဲ့တဲ့အတွက် ဂီတအနုပညာရှင် အယောက် ၂၀ ကျော် ကန့်ကွက် လက်မှတ်ထိုးပြီး သူတို့ရဲ့ တေးသီချင်းတွေကို အသုံးပြုခွင့် ပိတ်ပင်ခဲ့ဖူးတဲ့ သာဓကရှိခဲ့ဖူး ပါတယ်။

အဲဒီလို ကန့်ကွက်မှုတွေကြောင့် City FM အနေနဲ့ ကန့်ကွက်ထားတဲ့ အနုပညာရှင်တွေရဲ့ တေးသီချင်းတွေကို ရှောင်ပြီး ထုတ်လွှင့်ခဲ့ရဖူးတာလည်း ရှိခဲ့ပါတယ်။

“City FM ဥက္ကဋ္ဌ ဦးလှမြင့်ဆွေက အဲဒီလို ကန့်ကွက် လက်မှတ်ထိုးထားတဲ့ တေးရေးတွေ၊ အဆိုတော်တွေရဲ့ နာမည်ပါတဲ့ ကြော်ငြာဘုတ်တွေ ဆိုရင် ရန်ကုန်မြို့တွင်းမှာရှိတဲ့ စည်ပင် နယ်နိမိတ် အတွင်းမှာ ထောင်ခွင့် မပေးဘူး” လို့ တေးရေး ဆရာတဦးက ပြောဖူးပါတယ်။

အဲဒီလို တေးရေးတေးဆို နာမည်ပါတဲ့ ကြော်ငြာဘုတ်တွေကို ရန်ကုန်မြို့တွင်းမှာ ထောင်ခွင့်မရတဲ့အတွက် ထုတ်လုပ်သူ အခက်အခဲ တွေ့ရတယ်လို့ သူက ဆိုပါတယ်။

ဒါ့အပြင် ခိုးကူးကိစ္စနဲ့ ပတ်သက်ပြီးတော့ ရုပ်ရှင်အစည်းအရုံးက လွှတ်တော်အထိ တင်ပြထားပြီးပေမယ့်လည်း ဂီတအစည်းအရုံး အနေနဲ့တော့ ဘာမှ ဆောင်ရွက်နိုင်ခြင်း မရှိသေးကြောင်းကိုလည်း အဆိုတော်သားစိုးက ပြောပါတယ်။

ရုပ်ရှင် အစည်းအရုံးလိုပဲ ဂီတအစည်းအရုံးအနေနဲ့လည်း ဖြေရှင်းစရာတွေ ရှိနေသေးတဲ့အတွက် အမြန်ဆုံး ဖြေရှင်းနိုင်ဖို့ ဂီတလောကသားတွေက မျှော်လင့်နေကြတယ်လို့ သိရပါတယ်။

ဒေါ်အောင်ဆန်းစုကြည် စီစဉ်တဲ့ပွဲ ဇော်ဝင်းထွဋ်လည်းပါမယ်
ဒီဇင်ဘာလ ၁၅ ရက်နေ့ ရန်ကုန်မြို့သုဝဏ္ဏအားကစားကွင်းမှာ အဆိုတော် အနုပညာရှင်များ၊ တေးဂီတ၀ိုင်းများစွာ ပါဝင်ပြီး ခြိမ့်ခြိမ့်သဲသဲ ကျင်းပမယ် ဆိုတဲ့ ဂီတပွဲကြီးက ပါမစ်မရသလိုလို၊ ပွဲပျက်မလိုလို သတင်းကြားနေပါတယ်။

အဆိုတော် ဇော်ဝင်းထွဋ်

ဒါပေမယ့် အဲဒီပွဲ ကျင်းပဖြစ်ရင် အင်ပါယာတီးဝိုင်းနဲ့အတူ ရော့ခ်အဆိုတော် ဇော်ဝင်းထွဋ်လည်း ပါဝင် သီဆိုမယ်လို့ ပြောပါတယ်။

“ကျနော်က တပုဒ် နှစ်ပုဒ် ၀င်ဆိုဖြစ်မယ်။ တီးဝိုင်းစီစဉ်ပေးမယ်” လို့ ဇော်ဝင်းထွဋ်ကဆိုပါတယ်။

ဒီဖျော်ဖြေပွဲမှာ မြန်မာနိုင်ငံမှာ ရှိသမျှသော တေးဂီတ၀ိုင်းများစွာ ပါဝင်မှာဖြစ်ပြီး အဆိုတော် အနုပညာရှင်ပေါင်း ခန့်မှန်းခြေ ၅၀ နီးပါးလောက် သီဆို ပါဝင်မှာပါ။

ဒီဖျော်ဖြေပွဲကို လူထုခေါင်းဆောင် ဒေါ်အောင်ဆန်းစုကြည်ရဲ့ လမ်းညွှန်မှုနဲ့ ကျင်းပမှာဖြစ်ပြီးတော့ ပြည်ထောင်စု တိုင်းရင်းသားတွေအတွက် ပညာရေး ရန်ပုံငွေ အဖြစ် ဖျော်ဖြေ တင်ဆက်ကြမှာဖြစ်ပါတယ်။

“အရင်ကဆိုရင် တို့မြန်မာပြည်မှာ တခုခုလုပ်မယ်ဆိုရင် ဟိုဟာကြောက်ရ၊ ဒီဟာကြောက်ရ။ ဟိုမျက်နှာကြည့်ရ ဒီမျက်နှာကြည့်ရတွေက တအားများခဲ့တာကိုး။ အခုက အဲလိုမဟုတ်ဘဲ ဖေးဖေးမမနဲ့၊ စိတ်တူကိုယ်တူနဲ့ အထူးသဖြင့် အန်တီစုရဲ့ အိုင်ဒီယာတွေ အများကြီးပါပါတယ်။ အန်တီက လုပ်စေချင်တာကိုး။ အဓိကက ပိုက်ဆံရှာတာထက် ပြန်လည် စည်းလုံးညီညွတ်စေတာ မျိုးကို သူက လိုချင်တာ” လို့ အဆိုတော် ဇော်ဝင်းထွဋ်က ဆိုပါတယ်။

သူ့အနေနဲ့ အနုပညာရှင် အများအပြားပါဝင်မယ့် စိတ်ဓာတ်ခွန်အား နိုးကြားစေနိုင်တဲ့ တေးစီးရီးမှာလည်း ပါဝင် သီဆိုသွားဦးမှာလို့ ပြောပါတယ်။

တချိန်က လျှမ်းလျှမ်းတောက် ကျော်ကြားခဲ့တဲ့ ရော့ခ်အဆိုတော် ဇော်ဝင်းထွဋ်ဟာ “မဟာ” တေးစီးရီးခွေ ထွက်ရှိပြီးတဲ့ နောက် အဲဒီအခွေထဲက အစိုးရရဲ့ ပေါ်လစီသီချင်းတွေကြောင့် ပရိသတ် တချို့ရဲ့ ပြစ်တင် ဝေဖန်သံတွေနဲ့ အတူ အောင်မြင်မှုတွေ မှေးမှိန်ခဲ့ရတယ်လို့ သတင်းတွေ ထွက်ပေါ်ခဲ့ဖူး ပါတယ်။

ယင်းကဲ့သုပရိသတ်ရဲ့ အားပေးမှုအတိုင်းအတာအများဆုံးရရှိခဲ့ဖူးတဲ့ အဆိုတော် စိုင်းထီးဆိုင်ဟာလည်း တေးရေးမြသန်းစံရေးစပ်တဲ့ စစ်အစိုးရ အကျိုးပြုပေါ်လစီ တေးသီချင်းတွေ သီဆိုခဲ့ သည့်နောက်ပိုင်း ပရိသတ်ရဲ့ အားပေးမှုအတိုင်းအတာလျော့နည်းသွားခဲ့တာတော့ အမှန်ပါ။

၁၅ ရက်နေ့ပွဲကို ပရိသတ်က မျှော်လင့်နေသလို ပါဝင်မယ့် ဂီတပညာရှင်တွေလည်း တော်တော်လေး စိတ်အား ထက်သန်နေတာ တွေ့ရပါတယ်။

ဒီပွဲ မပျက်ပါစေနဲ့လို့ ဆုတောင်းရင်း …။

သမ္မတ ဦးသိန်းစိန်က ကာကွယ်ရေး ဦးစီးချုပ် ဗိုလ်ချုပ်ကြီး မင်းအောင်လှိုင်ထံ ဒီဇင်ဘာလ ၁၀ ရက်နေ့က ညွှန်ကြားစာ ပို့ထားကြောင်း သိရသည်။

။ ကချင်ပြည်နယ်အတွင်း အစိုးရတပ်များ ထိုးစစ်ဆင်ခြင်း ရပ်ဆိုင်းထားရန်အတွက် သမ္မတ ဦးသိန်းစိန်က ကာကွယ်ရေး ဦးစီးချုပ် ဗိုလ်ချုပ်ကြီး မင်းအောင်လှိုင်ထံ ဒီဇင်ဘာလ ၁၀ ရက်နေ့က ညွှန်ကြားစာ ပို့ထားကြောင်း သိရသည်။ 

ကချင် စစ်ပြေးရှောင် ဒုက္ခသည်များအတွက် ပြည်ထောင်စု လွှတ်တော်ကိုယ်စားလှယ်များက ပထမဆုံး အကြိမ်
ငွေကျပ် သိန်း ၇၀၀ နှင့် အဝတ်အထည်များ ပေးအပ်ပွဲနှင့် သတင်းစာ ရှင်းလင်းပွဲကို တနင်္လာနေ့က ပြုလုပ်ရာ၌ ၎င်းစာအား ကချင်ပြည်နယ် ဝန်ကြီးချုပ်  ဦးလဂျွန်ငံဆိုင်းက ဖတ်ပြခဲ့ခြင်း ဖြစ်သည်။ 

“ကယ်ဆယ်ရေး အလှူငွေ ပေးအပ်ပွဲလုပ်ရင်းနဲ့ ဂျာနယ်သတင်းထောက်တွေကို ရှင်းလင်းပွဲ လုပ်ပါတယ်။ အဓိက
တော့ တပ်ထိုးစစ်မဆင်ဖို့၊ ခုခံတိုက်ခိုက်ရုံမှလွဲပြီးမှ စစ်ကြောင်းမထိုးဖို့၊ သွားပြီးတော့မှ မတိုက်ဖို့ဆိုတဲ့ စာဖတ်ပြ တာပါ။”ဟု ဝန်ကြီးချုပ်နှင့် နီးစပ်သူ တဦးက မဇ္ဈိမကို ပြောသည်။ 

အဆိုပါ သတင်းစာ ရှင်းလင်းပွဲကို မြစ်ကြီးနားမြို့ရှိ မြို့တော်ခန်းမတွင် ပြုလုပ်ခြင်းဖြစ်ကာ  နံနက် ၈ နာရီမှ စတင်ခဲ့ခြင်းဖြစ်သည်။ ယင်းပွဲကို ပြည်နယ်နယ်ဝန်ကြီးများ၊ အစိုးရဌာနဆိုင်ရာဝန်များများ၊ နိုင်ငံရေးပါတီများ၊ ဘာသာရေးခေါင်းဆောင်များ၊ ရပ်မိရပ်ဖများ၊ သတင်းထောက်များအပါအဝင် စုစုပေါင်း လူ ၆ဝဝ ကျော် တက်ရောက်ခဲ့သည်။ 

“ကချင်ပြည်နယ်အတွင်း ငြိမ်းချမ်းရေး ဖော်ဆောင်ဖို့အတွက် ဦးစီးဦးဆောင်တွေ အလုပ်လုပ်နေတာ ဖြစ်တယ်။  အချင်းချင်း အထင်မှားအမြင်မှားမဖြစ်ဖို့။” ဟု အခမ်းအနား တက်ရောက်သူ မြစ်ကြီးနားမြို့ခံတဦးက ဆိုသည်။ 

ကချင်လွတ်မြောက်ရေးအဖွဲ့ KIO ကမူ အဆိုပါညွှန်ကြားစာနှင့်ပတ်သက်၍ တရားဝင် မသိရသေးကြောင်းနှင့် အစိုးရဘက်မှ ဆက်လက် ထိုးစစ်ဆင်နေပြီး  ယနေ့ထိ တိုက်ပွဲများဖြစ်ပွားနေသည်ဟု ဆိုသည်။ 

“ဒီနေ့ထိ တိုက်ပွဲဖြစ်နေတုန်းဘဲ။ အခု တပ်အင်အားတွေ ထပ်တိုးချဲ့မယ့် အစီအစဉ်တွေလည်း ရှိနေသေးတယ်။ မနက်ဖြန်လည်း စောင့်ကြည့်ရမယ်။ ဒါပေမယ့် သူတို့ အစိုးရတပ် ကျနော်တို့ နယ်မြေထဲမှာ ဝင်ရောက်နေတယ် ဆိုရင်လည်း မရဘူး။ ကျနော်တို့က လုပ်သင့်တာ ဆက်လုပ်ရမှာပဲ။” ဟု KIO ပြောရေးဆိုခွင့်ရှိသူ ဦးလနန်က မဇ္ဈိမကို ပြောသည်။

မိုးမောက်မြို့နယ် KIA တပ်မဟာ ၃ လက်အောက်ခံ တပ်ရင်း ၁၅ နယ်မြေအတွင်း ယနေ့ထိ တိုက်ပွဲများ ဆက်လက်
ဖြစ်ပွားနေဆဲ ဖြစ်သည်ဟု KIO စစ်ဘက်သတင်းများအရ သိရသည်။

အလားတူ ရှမ်းပြည်နယ်မြောက်ပိုင်း တပ်မဟာ ၄ နယ်မြေ ကွတ်ခိုင်မြို့နယ်အတွင်းတွင်လည်း ယခုလ ၁ဝ ရက်နေ့မှ စတင်၍ KIA ၏ တပ်ရင်း ၉ နယ်မြေအတွင်းသို့ အစိုးရတပ်များ ယနေ့ထိ ဝင်ရောက်လာနေဆဲဖြစ်သည်ဟုလည်း သိရသည်။ 

“ကွတ်ခိုင်နယ် ဟူးဖြတ်ဒေသဘက်မှာ လက်နက်အပြည့်ပါလာတဲ့ လားတွေနဲ့ စစ်သား ၁ဝဝ ကျော် တနေ့ကနေ ကျနော်တို့ ရင်း ၉ နယ်ဘက်ကို ဝင်လာနေတာဘဲ။ သမ္မတက စာပို့တယ်ဆိုရင်လည်း ဒီနေ့ ၁၂ ရက်လေ။ စစ်ရေး လှုပ်ရှားမှုက လုံးဝ မရပ်သေးဘူး။ ထိုးစစ်ဆင်နေတဲ့ တပ်တွေဆုတ်တာ မရှိသေးဘူး။ အစိုးရက အမြဲတမ်း လိမ်နေ
တော့ ပြောတာနဲ့လုပ်တာ တခြားစီပဲ။”ဟု တပ်မဟာ ၄ တာဝန်ခံ ဗိုလ်မှူးကြီး ဇော်ရော်က မဇ္စျိမကို ပြောသည်။

မြန်မာအမိူးသမီးလေးများရောင်းစားခံရ

ထိုင်းနိုင်ငံ ဘန်ကောက်မြို့ မဟာချိုင်ဒေသရှိ ပင်လယ်စာ ထုတ်လုပ်နေသော စက်ရုံ တရုံ၌ ရောင်းစားခံထားရသည့် မြန်မာ
အမျိုးသမီး ၄ ဦးကို ဗုဒ္ဓဟူးနေ့က ထိုင်းအာဏာပိုင်များ အကူအညီဖြင့် ကယ်တင်ခဲ့ကြောင်း လူ့အခွင့်အရေးနှင့် အလုပ်သမား အခွင့်အရေး ဆောင်ရွက်နေသူများက ပြောသည်။

ကယ်တင်ထားသော အမျိုးသမီးများသည် အသက်၂၀ ကျော် အရွယ်ရှိပြီး မြန်မာနိုင်ငံသို့ ပြန်ပို့ရန် လတ်တလော ဘန်ကောက် မြို့ရှိ လူဝင်မှုကြီးကြပ်ရေးဌာနတွင် ယာယီထိန်းသိမ်းထားသည်ဟု မဟာချိုင် အခြေစိုက် အလုပ်သမား အခွင့်အရေး မြှင့်တင် ရေးအဖွဲ့(LPN) မှ ဒါရိုက်တာ ဆွန်ဖွန် စခ၀ီက ဧရာဝတီသို့ ပြောသည်။

ယခင်လ အတွင်းက ထိုင်းနိုင်ငံ ချွန်ဘူရီမြို့နယ်တွင် ယင်း အမျိုးသမီးများ အပါအ၀င် ၃၉ ဦးခန့်သည် ထိုင်းအာဏာပိုင်များ၏ ဖမ်းဆီးခံရပြီးနောက် အချုပ်ကားဖြင့် နယ်စပ်သို့ ပြန်ပို့ရန်အသွား လမ်းခုလပ်တွင် လူပွဲစားများထံ ရောင်းစားခံခဲ့ရခြင်း ဖြစ်ကြောင်း သိရသည်။

“ပွဲစားတွေနဲ့ အချိတ်အဆက်လုပ်ပြီး ထောင်ကား မောင်းတဲ့ ရဲတယောက်က အဲဒီ ၃၉ ယောက်ကို နယ်စပ်ကို မပို့ဘဲနဲ့ လမ်းမှာ ဖြတ်ပြီးတော့ လက်ပြောင်း လက်လွှဲလုပ်လိုက်တယ်”ဟု ဘန်ကောက်မြို့တွင် အလုပ်သမားအရေး ဆောင်ရွက်နေသော ကိုဖိုးခွား က ရှင်းပြသည်။

ထို ၃၉ ဦးထဲမှ အမျိုးသားများသည် ငါးဖမ်း လုပ်ငန်းများ၌ ရောင်းစားခံရပြီး အမျိုးသမီးတချို့မှာ ပင်လယ်စာ ထုတ်လုပ်နေ သော စက်ရုံသို့ ရောင်းစားခံရကြောင်း၊ တဦးလျှင် ဘတ်ငွေ ၁၁၀၀၀ ခန့်ဖြင့် ရောင်းစားခြင်းဖြစ်ကြောင်း၊ ရောင်းစားခံ အမျိုးသမီး များက အကူအညီ တောင်းခဲ့သောကြောင့် မဟာချိုင်ဒေသရှိ ထိုင်းအာဏာပိုင်များနှင့်ပူးပေါင်း၍ သွားရောက်ကယ်တင်ခဲ့ခြင်း ဖြစ် ကြောင်း ၎င်းက ဆိုသည်။

ထိုင်းအာဏာပိုင်များ၏ အဆိုအရ ထောင်ကားမောင်းသည့် ရဲဝန်ထမ်းနှင့် နယ်စပ်ရှိ ဖမ်းဆီးခံရသည့် မြန်မာ အလုပ်သမားများ ကို လက်ခံမည့် လူဝင်မှုကြီးကြပ် ရေးဌာန(လ၀က) အာဏာပိုင်များအကြား စုံစမ်းစစ်ဆေးမှုများ ပြုလုပ်မည်ဟု သိရသည်။

ပြီးခဲ့သော ဇွန်လအတွင်းက ထိုင်းနိုင်ငံအလယ်ပိုင်း ဆူဖန်ဘူရီခရိုင်တွင် ထိုင်းအာဏာပိုင်များနှင့် မြန်မာ အလုပ်သမားအရေး ကူညီဆောင်ရွက် ပေးနေသူများပူးပေါင်းပြီး လူကုန်ကူးသည့် အဖွဲ့တဖွဲ့ကို ဝင်ရောက်ဖမ်းဆီးကာ လူကုန်ကူးခံရသူ မြန်မာ ၅၇ ဦးကို ကယ်တင်ခဲ့သည်။

လွန်ခဲ့သည့် မတ်လ၂၈ ရက်နေ့ကလည်း ထိုင်းနိုင်ငံတောင်ပိုင်း လဗ်ဘူရီခရိုင် ဘန်ချာမြို့နယ်အတွင်းရှိ VAK နာနတ်သီး စက်ရုံမှ မြန်မာနိုင်ငံသားများကို ထိုင်းအာဏာပိုင်များက ဖမ်းဆီးပြီးနောက် နယ်စပ်သို့ ပြန်ပို့ခံရသည့် ၂၁၆ ဦးထဲမှ ၉ ဦးအား ပွဲစား တဦးက ချွန်ဘူရီလှေဆိပ်၌ ရောင်းစားမှုဖြစ်ခဲ့သည်။

ထိုသို့ ရောင်းစားခံရသော မြန်မာနိုင်ငံသား ၉ ဦးသည် ကရင်ပြည်နယ် မြ၀တီမြို့မြေနီကုန်း ရပ်ကွက်မှ ဒေသခံများဖြစ်ကြောင်း သိရသည်။

မြန်မာနိုင်ငံသားများ လူကုန်ကူး ခံရနေခြင်းသည် စီးပွားရေးကျပ်တည်းပြီး အလုပ်အကိုင် ရှားပါးမှုကြောင့် ဖြစ်ကြောင်း ၀ါရှင် တန် အခြေစိုက် လူကုန်ကူးမှု တိုက်ဖျက်ရေးအဖွဲ့က ဆိုသည်။

ထိုင်းနိုင်ငံရှိ မြန်မာ အလုပ်သမားများကို အကူအညီပေးနေသော World Vision အဖွဲ့ကလည်း အာရှနိုင်ငံများတွင် လူကုန် ကူးမှုများရှိသော်လည်း ထိုင်းနိုင်ငံတွင် အများဆုံးဖြစ်ကြောင်း ပြောဆိုသည်။

လွန်ခဲ့သည့် ၂၀၀၉ ခုနှစ် ဧပြီလလယ်တွင် ထိုင်းနှင့် မြန်မာ လူကုန်ကူးမှုပူးပေါင်းတိုက်ဖျက်ရေး နားလည်မှုစာချွန်လွှာကို နှစ်နိုင်ငံ တာဝန်ရှိသူများက လက်မှတ်ရေးထိုးခဲ့သည်။

ဘန်ကောက်မြို့အပါအ၀င် ထိုင်းနိုင်ငံ တ၀န်းတွင် မြန်မာပြည်သား အလုပ်သမား စုစုပေါင်း ၂ သန်းမှ ၄ သန်း အထိရှိသည်ဟု အလုပ်သမားအဖွဲ့များက ခန့်မှန်းထားကြသည်။

ကျောက်ဖြူမြို့ လုပ်ငန်းခွင်ကြောင့် ပျက်စီးနေသော လမ်းများကို ပြင်ဆင်ပေးရန် ပြည်နယ် အစိုးရထံ တိုင်ကြားထားကြကြောင်း ဒေသခံတို့က ပြောသည်။

ရွှေသဘာဝ ဓာတ်ငွေ့ပိုက်လိုင်း စီမံကိန်း၏ ရခိုင်ပြည်နယ်၊ ကျောက်ဖြူမြို့ လုပ်ငန်းခွင်ကြောင့် ပျက်စီးနေသော လမ်းများကို ပြင်ဆင်ပေးရန်  ပြည်နယ် အစိုးရထံ တိုင်ကြားထားကြကြောင်း ဒေသခံတို့က ပြောသည်။

ပိုက်လိုင်းတင် ကားကြီးများ နေ့စဉ်သွားလာမှုကြောင့် ပျက်စီးရခြင်း ဖြစ်ပြီး ထိုလမ်းများတွင် မတော်တဆမှု မကြာခဏ ဖြစ်ပွားနေကြောင်း  ကျောက်ဖြူမြို့မှ  ပြည်သူ့လွှတ်တော် ကိုယ်စားလှယ် ဦးဘရှိန်က ပြောသည်။

ဂက်စ်ပိုက်လိုင်း တည်ဆောက်ရေး စီမံကိန်း နယ်မြေတခု မြင်ကွင်း (ဓာတ်ပုံ - ရွှေ သဘာဝ လှုပ်ရှားမှုအဖွဲ့)

“လမ်းတွေ ပျက်စီးကုန်တဲ့ အတွက် ဆိုင်ကယ်တွေ မတော်တဆမှုတွေ၊ ထိခိုက်ဒဏ်ရာ ရတာတွေ တွေ့နေရတော့ ၀န်ကြီးဦးသန်းဌေးကိုရော ဗဟိုအစိုးရအဖွဲ့ဝင် တချို့ကိုပါ ပြောဆို တင်ပြတော့ ဆောင်ရွက်ပေးမယ် ပြောပေမယ့် လက်တွေ့က ဖြစ်မလာဘူး” ဟု ဦးဘရှိန်က ဧရာဝတီကို ပြောသည်။

စီမံကိန်းလုပ်ငန်းခွင်များ၌ ဖြစ်ပွားနေသည့် ပြဿနာများကို  အရေး မယူခြင်း၊ လာဘ်ပေး လာဘ်ယူမှု ဆက်လက် ရှိနေခြင်း တို့ကို ရခိုင်ပြည်နယ်တွင် တွေ့မြင်နေရကြောင်း၊ ဗဟိုအစိုးရကလည်း  စနစ်တကျ ကိုင်တွယ် ဖြေရှင်းရန် လိုအပ်နေကြောင်း ဦးဘရှိန်က ထောက်ပြသည်။

“မြန်မာနိုင်ငံမှာ တရားဥပဒေ စိုးမိုးမှု မရှိသေးဘူး၊  အဂတိ လိုက်စားမှု တိုက်ဖျက်မယ်လို့ သမ္မတက ပြောတာကို ၀န်ကြီးအဆင့်က လိုက်နာဖို့ လိုတယ်၊ မလိုက်နာရင် ၀န်ကြီးလည်းပဲ အရေးယူဖို့ လိုမယ်၊ ၀န်ကြီး အဆင့်ကို အရေးမယူရင် အောက်ခြေ အဆင့် အာဏာပိုင်တွေကလည်းပဲ အာဏာအလွဲသုံးစား လုပ်နေကြဦးမှာပါ” ဟု လွှတ်တော် ကိုယ်စားလှယ် နှင့်ရှေ့နေ တဦး ဖြစ်သူ ဦးဘရှိန်က ဆိုသည်။

ပျက်စီးနေသောလမ်းများကို အမြန်ဆုံး ပြန်လည် ပြင်ဆင်ပေးစေလိုသည်ဟု ဒေသခံတို့က ဧရာဝတီကို ပြောသည်။

“ဆိုင်ကယ်၊ ဆိုက်ကား၊ စက်ဘီး၊ နွားလှည်းက အစ သွားလို့ မရတော့ပါဘူး၊ ကျောက်ဖြူမြို့နယ် တ၀ိုက် ၁၀ မိုင် ၀န်းကျင်မှာ ရှိတဲ့ ကားလမ်း အားလုံး နီးပါး ပျက်သွားပါပြီ၊ ချိုင့်ခွက်တွေ ဖြစ်သွားတော့ လူတွေတောင် ည  ၆ နာရီ ဆိုရင် အဲဒီ လမ်းတွေမှာ လမ်းလျှောက်လို့ မရတော့ဘူး” ဟု ဂုံးချိန် ရွာသား တဦးက ဆိုသည်။

လမ်းပျက်စီးမှုအတွက် တာဝန်ရှိသော ပိုက်လိုင်း သယ်ယူ ပို့ဆောင်နေသည့် ပါရမီကုမ္ပဏီတွင် လက်ရှိ စွမ်းအင်ဝန်ကြီး ဦးသန်းဌေး၊ ၀န်ကြီးဟောင်း ဦးလွန်းသီတို့၏ သားသမီးများ ပါဝင်နေသည့် အတွက် ပြည်နယ် အစိုးရက အရေးယူရန် ၀န်လေးနေခြင်း ဖြစ်ပုံရကြောင်း ကျောက်ဖြူ ဒေသခံများက ပြောသည်။

“ပြည်နယ် လမ်းပန်း ဆက်သွယ်ရေး ၀န်ကြီး ဦးကျော်ခင်ကို ဒေသခံတွေက စုပြီး တိုင်ကြတယ်၊ ပြည်ထောင်စုအဆင့် ၀န်ကြီး သားသမီးတွေ ပိုင်တဲ့ ကုမ္ပဏီတွေ ဖြစ်နေတော့ သူ့မှာ ပြောဆိုခွင့်၊ ဖြေရှင်းပေးပိုင်ခွင့် မရှိဘူးလို့ သိရတယ်” ဟု ဒေသခံ တဦးက ဆိုသည်။

ကျောက်ဖြူ ရေနက်ဆိပ်ကမ်း စီမံကိန်း၊ ဂက်စ်ပိုက်လိုင်း စီမံကိန်းနှင့် ဆက်စပ်နေသော လုပ်ငန်းခွင် တချို့၌ မြန်မာနိုင်ငံမှ အေးရှားဝေါလ်၊ သန္တာနဂါး၊ မြန်မာ့ရွှေသရဖူ၊ 7-Star, PSC, Myint and Association စသည့်  ကုမ္ပဏီများက တည်ဆောက်ရေး လုပ်ဆောင်နေကြသည်။

ဂက်စ်ပိုက်လိုင်းသည် ရခိုင်ပြည်နယ်မှ မကွေးတိုင်း၊ မန္တလေးတိုင်း၊ ရှမ်းပြည်နယ်တို့ကိုဖြတ်၍ တရုတ်နိုင်ငံသို့ သွယ်တန်းမည်ဖြစ်ကာ ကီလိုမီတာ ၂၈၀၀ ၀န်းကျင် ရှည်လျားသည်။

ရှမ်းပြည်နယ်အတွင်း ပိုက်လိုင်းဖြတ်သန်းရာ သီပေါနှင့် ကျောက်မဲ မြို့နယ်တို့မှ လယ်သိမ်းခံထားရသော လယ်သမားများ လျော်ကြေးငွေကို အပြည့်အ၀ မရသေးကြောင်း ပိုက်လိုင်းစီမံကိန်းကို စောင့်ကြည့်နေသည့် ရွှေဂက်စ်လှုပ်ရှားမှု အဖွဲ့မှ ဂျက်စမင်း က ပြောသည်။

“တချို့ဒေသတွေက တိုက်ပွဲတွေ ဖြစ်လေ့ရှိတဲ့ နေရာဆိုတော့ ဘာတွေ ဆက်ဖြစ်လာမယ် ဆိုတာ မပြောနိုင်တဲ့အတွက် လျော်ကြေးကို တ၀က်ပဲ ပေးတာပါ၊ တရုတ်ပြည်နဲ့ နီးစပ်တဲ့ နေရာတွေမှာတော့ လျော်ကြေး အပြည့် ပေးတယ်လို့ သိရပါတယ်” ဟု ဂျက်စမင်းက ဆိုသည်။

ကချင်ဒေသ စစ်ပြေးဒုက္ခသည် ပိုများလာ

လက်နက်ကိုင်ပဋိပက္ခတွေကနေ ထွက်ပြေးနေရတဲ့ ဒုက္ခသဘ်တွေကို ကုလသမဂ္ဂက ၀င်ရောက်ကူညီဖို့ ကြိုးစားနေချိန်မှာပဲ ကချင်ဒုက္ခသည် အရေအတွက်ဟာ တနေ့တခြား ပိုတိုးလာနေပြီး လိုအပ်ချက်တွေလည်း ပိုများလာနေပါတယ်။ တိုက်ပွဲတွေ ရပ်ဆိုင်းဖို့ မြန်မာအစိုးရနဲ့ ကချင်လက်နက်ကိုင်အဖွဲ့တွေအကြား ငြိမ်းချမ်းရေး ဆွေးနွေးမှုတွေ မအောင်မြင်သေးတာနဲ့အမျှ ဒုက္ခသည်ပြဿနာဟာလည်း ပိုပြီးတော့ ကြီးထွားလာနေတာ ဖြစ်ပါတယ်။ ဒီအခြေအနေတွေကိုတော့ မသင်းသီရိက တင်ပြထားပါတယ်။

ကချင်ပြည်နယ်ထဲက ဗန်းမော်ခရိုင်တွင်းမှာ ဒီရက်ပိုင်း ပိုပြီးပြင်းထန်လာတဲ့ တိုက်ပွဲတွေကြောင့် ထွက်ပြေးနေကြရတဲ့ဒုက္ခသည်တွေဟာ တရုတ်-မြန်မာ နယ်စပ်ဘက်တွေမှာ ပိုပြီးတိုးလာနေတယ်လို့ ကချင်ဒုက္ခသည် ကူညီရေးအဖွဲ့တွေက ပြောပါတယ်။ ကချင်ပြည်နယ်တွင်းမှာ ခုချိန်ထိ ပြေလည်မှု မရသေးတာကြောင့်ရော၊ တိုက်ပွဲတွေဟာ ၇ လနီးပါး ကြာနေပြီမို့ နေရပ်စွန့်ခွာထွက်ပြေးရတဲ့ ဒုက္ခသည်တွေဟာ တစထက်တစ ပိုများလာနေတယ်လို့ ကချင်လူမှုရေးအဖွဲ့က မမိုင်းဂျာက ပြောပါတယ်။

“မိုင်ဂျာယန်ဘက်မှာကတော့ ထွက်ပြေးလာတာကတော့ လွင်ကျယ်နဲ့ မိုးမောက်မြို့နယ်ဘက်က ရွာသားတွေ၊ ပြီးရင် လိုင်ဇာနဲ့ မိုင်ဂျာယန်ကြားမှာရှိတဲ့ ဂေါင်လီချိုင့်ဝှမ်းလို့ခေါ်တဲ့ အဲဒီဒေသဘက်က အခုတိုက်ပွဲ ဖြစ်နေတယ်။ အဲဒီဘက်က ဒုက္ခသည်တွေပေါ့၊ ရွာသွားတွေ။ နောက်ပြီးတော့ ရွှေလီမြို့နဲ့ နည်းနည်း မျက်နှာချင်းဆိုင်လိုဖြစ်တဲ့နေရာ နွန်တောင်း လို့ခေါ်တယ်။ တရုတ်ပြည်ဘက်ခြမ်းကပေါ့နော်။ အဲဒီဘက်ကိုလည်း နေ့တိုင်းလိုပဲ ထွက်ပြေးလာတာတွေ ရှိတာက ဗန်းမော်-နမ့်ခမ်း ကားလမ်းကြား ဘယ်ညာမှာရှိတဲ့ ရွာတွေထဲက ရွာသားတွေ။”

မြန်မာအစိုးရတပ်တွေနဲ့ ကချင်လွတ်လပ်ရေးတပ် KIO တို့ကြားမှာဖြစ်နေတဲ့ လက်နက်ကိုင် ပဋိပက္ခတွေကြောင့် နေရပ်ဒေသကို ထွက်ပြေးတိန်းရှောင် နေရတဲ့ ကချင်စစ်ပြေးဒုက္ခသည်တွေကို အကူအညီပေးနိုင်ဖို့အတွက် ကုလသမဂ္ဂရဲ့ မြန်မာနိုင်ငံဆိုင်ရာ အထူးကိုယ်စားလှယ် ဗီဂျေးနမ်ဘီးယားက လုပ်ဆောင်နေတယ်လို့ ကုလသမဂ္ဂက ပြီးခဲ့တဲ့ရက်အနည်းငယ်ကပဲ ပြောပါတယ်။ အလားတူ မြန်မာနိုင်ငံထဲက လူမှုရေးအဖွဲ့တွေကလည်း ကချင်ဒုက္ခသည်တွေကို ကူညီပေးနေတာ ရှိပေမဲ့ အစိုးရဘက်က ကူညီသူတွေအတွက် နယ်မြေသတ်မှတ်ချက် ရှိတာကြောင့် ဘယ်အဖွဲ့အစည်းရဲ့ အကူအညီမျိုးမှ သူတို့ဘက်မှာ မရသေးဘူးလို့လည်း ပြောပါတယ်။

“အခုထက်ထိတော့ မရှိသေးဘူး။ ပေးမယ်ဆိုတာမျိုးတော့ ကြားထားတယ်။ ဒါပေမဲ့ အခုထက်ထိတော့ မရောက်သေးဘူး။ အစိုးရဘက်က ခွင့်ပြုမပြုပေါ့နော် အဲဒီဟာပဲ အဓိကဖြစ်မယ်ထင်တယ်။ ကျမတို့ဆီမှာလည်း အခု လောလောဆယ် တကယ်ပဲ အစားအသောက် အခက်အခဲ၊ နေရာထိုင်ခင်း အခက်အခဲ ပြဿနာတွေ၊ ဆောင်းတွင်းလည်း ဖြစ်တဲ့အတွက်ကြောင့်မိုလို့ စောင်ကအစ အဲဒီဟာတွေ အများကြီး အခက်အခဲဖြစ်နေတယ်။”

အခုလို ဒုက္ခသည်တွေ ပိုတိုးလာတဲ့ အကြောင်းရင်းကတော့ ဒီရက်ပိုင်းတွေမှာ တိုက်ပွဲတွေ ပိုပြီး ပြင်းထန်လာနေတာကြောင့် ဖြစ်တယ်လို့ KIA အဖွဲ့က ဒုတိယစစ်ဦးစီးချုပ် ဗိုလ်မှူးချုပ် ဂွမ်မော်က ပြောပါတယ်။

“အဓိကကတော့ တပ်မဟာ (၃) တပ်ရင်း (၁၂)၊ တပ်ရင်း (၂၇)၊ တပ်ရင်း (၁၅) နဲ့ တပ်မဟာ (၅)တွေက တပ်ရင်း (၃) ဌာနချုပ်တွေမှာ တိုက်ပွဲတွေ ပြင်းထန်ပါတယ်။ အဲဒီတော့ ဒီ နှစ်ရက်သုံးရက်ကြားထဲမှာပဲ အစိုးရစစ်တပ်တွေက အင်အားတိုးလာတယ်။ ကလေးမှာရှိတဲ့ စကခ (၁၀) တပ်က တက်လာတယ်။ တပ်မဟာ (၉၉) ကလည်း နည်းနည်း လှုပ်လှုပ်ရှားရှား ဖြစ်နေတယ်။ တပ်တွေ ဖြည့်လာရင်တော့ တိုက်ပွဲတွေက ပိုပြီးများလာမှာပဲ။ အဲဒီတော့ သူတို့က ဘာရည်ရွယ်ချက်နဲ့ တပ်မတွေ စကခ တွေကို ထပ်ပြီးတော့ ဘာလို့ပို့နေလဲတော့ ကျနော်တို့လည်း မသိဘူး။ ဒါပေမဲ့ တပ်တွေတိုးလာရင်တော့ တိုက်ပွဲတွေက ပိုများလာဖို့ရှိပါတယ်။”

နယ်ခြားစောင့်တပ် အသွင်ကူးပြောင်းဖို့ လက်မခံတဲ့ ကချင်အပါအ၀င် တခြား တိုင်းရင်းသား လက်နက်ကိုင် ၅ ဖွဲ့နဲ့ အစိုးရက ငြိမ်းချမ်းရေး အဆိုပြုချက်သစ်တရပ်ကို ကမ်းလှမ်းခဲ့ပြီးတဲ့နောက် ပြီးခဲ့တဲ့လပိုင်းမှာကိုပဲ ကချင်လွတ်လပ်ရေးတပ်ဖွဲ့ KIO နဲ့ မြန်မာအစိုးရ အဆင့်မြင့် ကိုယ်စားလှယ်တွေ တရုတ်နိုင်ငံ ရွှေလီဘက်မှာ အပစ်အခတ် ရပ်စဲရေးအတွက် ဆွေးနွေးတာရှိပေမဲ့ ညှိနှိုင်းချက်တွေ မအောင်မြင်ခဲ့ပါဘူး။ ဒါဟာ မြန်မာအစိုးရဘက်က အပစ်အခတ် ရပ်စဲရေးနဲ့ပတ်သက်လို့ ပွင့်လင်းမြင်သာမှု မရှိတာကြောင့် ဖြစ်တယ်လို့ ဗိုလ်မှူးချုပ် ဂွမ်မော်က သုံးသပ်ပါတယ်။

“ဘာဖြစ်လို့လဲဆိုတော့ တနိုင်ငံလုံးသိအောင် ပွင့်လင်းမြင်သာတဲ့ တရားဝင်လမ်းကြောင်းကနေ ဆက်သွယ်တာမျိုး သိပ်မရှိပါဘူး။ အဲဒီတော့ ကျနော်တို့က တရားဝင်ဖြစ်တဲ့လမ်းကြောင်းတွေ ဖြစ်စေချင်တယ်။ အဲဒီတော့ ဘယ်လိုဆွေးနွေးကြသလဲ ဆိုတာတွေလည်း ပြည်သူလူထုတွေကို သေချာပြောဖို့ လိုအပ်တယ်လို့ ထင်တယ်။ ကျနော်တို့ကတော့ ပွင့်လင်းမြင်သာမှုကို လိုချင်ပါတယ်။ နောက်ဆုံး ကျနော်တို့ ဦးအောင်မင်းတို့နဲ့ တွေ့တဲ့အချိန်မှာတောင်မှာ ဦးအောင်မင်းက ကျနော်တို့ကို တရားဝင် နိုင်ငံတော်ကနေ သူတို့ နှုတ်နဲ့လာတယ်၊ ဒါ ကျနော်တို့ အသိအမှတ်ပြုတယ်။ ဒါပေမဲ့ ဦးအောင်မင်းက သူ့ရဲ့မှတ်စုစာရွက်ထဲမှာ ရေးထားတဲ့စာရွက်တစ်ရွက်ကို ဆုပ်ဖြဲပြီးတော့ ပေးထားခဲ့တဲ့အဆင့်ပဲ ဖြစ်နေတယ်လေ။ အဲဒီတော့ ကျနော်တို့က ဒါကို တရားဝင်ဖြစ်တယ်လို့ ပြောရမှာ တော်တော်ကို ခက်ပါတယ်။”

ကချင် KIA ဒုတိယစစ်ဦးစီးချုပ် ဗိုလ်မှူးချုပ် ဂွမ်မော် ပြောခဲ့တာဖြစ်ပါတယ်။ ဒါပေမဲ့ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်ကတော့ မြန်မာနိုင်ငံမှာ ငြိမ်းချမ်းရေးရဖို့အတွက် အခွင့်အလမ်းတွေ ပွင့်နေတာကြောင့် ငြိမ်းချမ်းပြီး လူ့အခွင့်အရေးပြည့်ဝတဲ့ ဒီမိုကရေစီနိုင်ငံကိုရောက်အောင် ၀ိုင်းဝန်း ဆောင်ရွက်ကြဖို့အတွက် ဒီဇင်ဘာလ ၁၀ ရက်နေ့က ပြောခဲ့တဲ့ သူ့ရဲ့မိန့်ခွန်းထဲမှာ တိုက်တွန်းထားပါတယ်။

နိုင်ငံရေးအရ ဆွေးနွေးပွဲများ ပြေလည်မှုမရပါက အချိန်မရွေး သေနတ် ပြန်ပေါက်နိုင်ကြောင်း ပြောဆို လိုက်သည်။

မကြာသေးခင်က အစိုးရနှင့် အပစ်အခတ် ရပ်စဲရေး ပြုလုပ်ထားသည့် ရှမ်းပြည်တပ်မတော် တောင်ပိုင်း ခေါ် ရှမ်းပြည်ပြန်လည် တည်ဆောက်ရေးကောင်စီ SSA/ RCSS အဖွဲ့က နိုင်ငံရေးအရ ဆွေးနွေးပွဲများ ပြေလည်မှုမရပါက အချိန်မရွေး သေနတ် ပြန်ပေါက်နိုင်ကြောင်း ပြောဆို လိုက်သည်။

အပစ်အခတ် ရပ်စဲရေးနှင့် ပတ်သက်၍ ယနေ့နံနက်က SSA/ RCSS ဌာနချုပ် လွယ်တိုင်းလျဲန်း၌ ပြုလုပ်သည့် သတင်းစာ ရှင်းလင်းပွဲတွင် ရဟန်းသံဃာ၊ ပြည်သူလူထုများနှင့် တပ်ဖွဲ့ဝင်များအား  RCSS ဥက္ကဌ ဒု-ဗိုလ်ချုပ်ကြီး ယွက်ဆစ်က ယင်းသို့ ပြောဆိုလိုက်ကြောင်း အခမ်းအနား တက်ရောက်ခဲ့သည့် တပ်မှူးတဦးက အခုလိုပြောသည်။

“အပစ်အခတ် ရပ်စဲတာနဲ့ ငြိမ်းချမ်းရေးကို ခွဲပြတယ်။ အပစ်အခတ် ရပ်စဲတယ်ဆိုတာ ကိုယ့်သေနတ် ကိုယ်ကိုင်ထားပြီး ပစ်ခတ်မှုမလုပ်ဘဲ နှစ်ဦး သဘောတူ ရပ်ထားတာပေ့ါ။ ငြိမ်းချမ်းရေး ဆိုတာက နိုင်ငံရေးအရ ဖြေရှင်းပြီးတော့ တိုင်းပြည် အေးအေးချမ်းချမ်း ဖြစ်သွားတယ်ဆိုတဲ့ အကြောင်းကို ပြောပြတာ။ အခုလုပ်တာက အပစ်ရပ်ထားတာပဲ ဖြစ်တယ်။ တကယ်လို့ နိုင်ငံရေး အဆင်မပြေရင် အချိန်မရွေး သေနတ် ပြန်ပေါက်လို့ ရတယ်ပေ့ါ။”

တချိန်တည်းတွင် RCSS အဖွဲ့က ယနေ့ရက်စွဲဖြင့် ကြေညာချက်တစောင် ထုတ်ပြန်လိုက်ပြီး အစိုးရအဖွဲ့ အနေနှင့် ငြိမ်းချမ်းရေး လုပ်ငန်းစဉ်မှ သွေဖယ်နေခြင်း၊ လူ့အခွင့်အရေးများ ပိတ်ပင် တားဆီးခြင်းနှင့် တိုင်းရင်းသားများအပေါ် ဖိနှိပ်မှုများ ဆက်လက် ကျူးလွန်နေပါက မိမိကိုယ်မိမိ ကာကွယ်ရန်နှင့် တိုင်းပြည်နှင့် အမျိုးသားရေးအတွက် တိုက်ပွဲဝင်ရန် အသင့်ဖြစ်ကြောင်း ဖော်ပြ ပါရှိသည်။

ထို့အပြင် ပြည်နယ်အစိုးရက ဆုံးဖြတ်ချက်ချမှတ်ရန် ခက်ခဲနေသည့် အချက်များအား ပြည်ထောင်စု အစိုးရအဆင့်တွင် ဆက်လက်ဆွေးနွေးရန်နှင့် ယင်းလုပ်ငန်းစဉ်များ ဆက်လက် အကောင်အထည် ဖော်နိုင်ရေးအတွက် အစိုးရအပေါ် မူတည်သည်ဟုလည်း ဖော်ပြထားသည်။

ယင်းကိစ္စနှင့် ပတ်သက်၍ “နိုင်ငံရေး ဆွေးနွေးပွဲတွေက ရေရှည်ပြုလုပ်ရမယ့် ကိစ္စဆိုတော့ အဲဒီကိစ္စ က နည်းနည်း ကြန့်ကြာ နိုင်တယ်။” ဟု အစည်းအဝေး တက်ရောက်ခဲ့သည့် တပ်မှူးက သုံးသပ် ပြောဆိုသည်။

အပစ်အခတ် ရပ်စဲရေးအတွက် ပထမ အကြိမ် ဆွေးနွေးပွဲကို အစိုးရဘက်မှ ရထားပို့ဆောင်ရေး ၀န်ကြီး ဦးအောင်မင်း ဦးဆောင်သည့် အဖွဲနှင့် SSA/ RCSS ဘက်မှ ဒု-ဗိုလ်ချုပ်ကြီး ယွက်ဆစ် ဦးဆောင်သည့် ကိုယ်စားလှယ် အဖွဲ့တို့ နိုဝင်ဘာလ (၁၉) ရက်နေ့က ထိုင်းမြန်မာ နယ်စပ် တနေရာ၌ တွေ့ဆုံခဲ့သည်။

ယင်းတွေ့ဆုံပွဲ၌ အပစ်အခတ်ရပ်စဲရန်၊ နှစ်ဖက် ဆက်သွယ်ရေးရုံးများ ထားရှိရန်၊ လက်နက် ကိုင်ဆောင်ခြင်း မပြုဘဲ လွတ်လပ်စွာ သွားလာနိုင်ရန်နှင့် နိုင်ငံရေးကိစ္စများကို ပြည်ထောင်စု အဆင့်တွင် ဆွေးနွေးရန် စသည့် ငြိမ်းချမ်းရေးမူ လေးချက်ကို အစိုးရဖက်က တင်ပြခဲ့သည်။

အလားတူ SSA/ RCSS ဘက်ကလည်း အပစ်အခတ်ရပ်စဲရေး၊ နိုင်ငံရေး ပြဿနာကို လွတ်လပ်စွာ ဖြေရင်းရေး၊ ဒေသဖွံ့ဖြိုးရေး လုပ်ငန်းများ လုပ်ဆောင်နိုင်ရန် ဗဟိုဌာနချုပ် နယ်မြေ သတ်မှတ်ပေး ရေးနှင့် မူးယစ်ဆေးဝါးတိုက်ဖျက်ရေး လုပ်ငန်းများတွင် ပူးပေါင်ပါဝင်ရေး စသည့် အချက်လေးချက် ကို တင်ပြခဲ့ရာ ၀န်ကြီး ဦးအောင်မင်းက တရားဝင် လက်ခံရရှိကြောင်း လက်မှတ်ရေးထိုးခဲ့သည်။

ပြည်နယ်အဆင့် ကိုယ်စားလှယ်အဖွဲ့နှင့် ဒုတိယအကြိမ် တွေ့ဆုံဆွေးနွေးပွဲကို ဒီဇင်ဘာလ (၂) ရက်နေ့က တောင်ကြီးမြို့တွင် ပြုလုပ်ခဲ့ပြီး အစိုးရဘက်မှ ပြည်နယ်ဝန်ကြီးချုပ် စောဝ်အောင်မြတ် ဦးဆောင်သည့် ငြိမ်းချမ်းရေး ဖော်ဆောင်ရေး အဖွဲ့မှ ကိုယ်စားလှယ် (၁၀) ဦး နှင့် SSA/ RCSS ဘက်မှ ဗိုလ်မှူးချုပ် စိုင်းလူး ဦးဆောင်သည့် အဖွဲ့ဝင် (၆) ဦးတို့က နှစ်ဖက် တင်ပြချက်(၈) ချက် အား  မူအရ လက်ခံခဲ့ပြီး သဘောတူ လက်မှတ်ရေးထိုး ခဲ့သည်။

ရှမ်းပြည်တပ်မတော် တောင်ပိုင်းခေါ် ရှမ်းပြည်ပြန်လည် တည်ဆောက်ရေး ကောင်စီ SSA/ RCSS အဖွဲ့သည် ၁၉၈၉ ခုနှစ်က စစ်အစိုးရနှင့် အပစ်အခတ်ရပ်စဲခဲ့သည့် ဦးခွန်ဆာ ဦးဆောင်သည့် အဖွဲ့မှ ခွဲထွက်ခဲ့ပြီး အစိုးရကို လက်နက်ကိုင် တိုက်ပွဲဝင်နေသည့် အဖွဲ့ဖြစ်သည်။

ဖဒိုမန်းငြိမ်းမောင် ကို မင်္ဂလာဒုံမှာ ရုံးထုတ်စစ်ဆေး

KNU တပ်မဟာတွင် တာဝန်ထမ်းဆောင်ခဲ့သူ အမျိုးသားတစ်ဦး တရုတ်ပြည်မှ ရန်ကုန်လေဆိပ်သို့ လက်မှတ်အတုဖြင့် ဝင်ရောက်လာသဖြင့် မတရားအသင်းအက်ဥပဒေဖြင့် မင်္ဂလာဒုံတရားရုံးက ဒီဇင်ဘာ ၈ ရက်တွင် စစ်ဆေးနေကြောင်း သိရသည်။

သိုက်ထွန်း (ခ) ဖဒိုမန်းငြိမ်းမောင် ဆိုသူသည် သားထူးဇော် အမည်ဖြင့် နိုင်ငံကူးလက်မှတ် M-073525 ကိုင်ဆောင်၍ တရုတ်ပြည် ကူမင်းလေဆိပ်မှ ရန်ကုန်လေဆိပ်သို့ လွန်ခဲ့သည့် လပိုင်းအတွင်း လာရောက်ခဲ့ရာ လေဆိပ်ရဲစခန်းမှ တာဝန်ရှိသူများက ၎င်း ကိုင်ဆောင်ထားသော နိုင်ငံကူးလက်မှတ်ပေါ်တွင် လေဆိပ်လဝကအတွက် တံဆိပ်တုံး အတုရိုက်နှိပ်ထားသည်ကို စစ်ဆေးတွေ့ရှိရ၍ လေဆိပ်ရဲစခန်းက (ပ) ၈၀/၁၁၊ ပုဒ်မ ၄၂၀/၄၆၈/၄၇၁ နှင့် လဝက အက်ဥပဒေ (ပ) ၉/၁၁ ၁၉၄၇ ခုနှစ် လဝကအက်ဥပဒေပုဒ်မ ၆၁၃ (၁) ၁၇ (၇) (က) (ဃ) တို့ဖြင့် အမှုဖွင့်အရေးယူပြီး မင်္ဂလာဒုံတရားရုံးသို့တင်ပို့ရာ တရားရုံးက သိုက်ထွန်းအား အပြစ်ရှိကြောင်း စစ်ဆေးသိရှိရ၍ စက်တင်ဘာ ၂၇ ရက်က မင်္ဂလာဒုံတရားရုံးက ပုဒ်မ ၄၆၈ ဖြင့် ထောင်ဒဏ်ခြောက်လ လူဝင်မှုအက်ဥပဒေပုဒ်မ ၁၃(၁) အရ ထောင်ဒဏ်ခြောက်လ စုစုပေါင်းတစ်နှစ်ချမှတ်ခဲ့သည်။

“လေဆိပ်ရဲစခန်းက တာဝန်ရှိသူတွေအနေနဲ့ ပြည်ပအဝင်အထွက်တွေ စနစ်တကျ သေချာစစ်ဆေးတယ်။ မသင်္ကာတဲ့သူ၊ ပြစ်မှုကျူးလွန်တဲ့သူလို့ ယူဆရင် သီးခြားအခန်းမှာ အဲဒီသူရဲ့ ပစ္စည်းတွေကို တစ်ခုချင်းစနစ်တကျစစ်ဆေးနေပါတယ်။ လုံခြုံရေးကို တင်းတင်းကြပ်ကြပ်ဆောင်ရွက်နေပါတယ်” ဟု လေဆိပ်ရဲစခန်းမှ တာဝန်ရှိသူတစ်ဦးက ပြောသည်။

သိုက်ထွန်းဆိုသူကို ထပ်မံစစ်ဆေးချက်များအရ ၎င်းသည် တရားမဝင်အသင်းအဖြစ် ကြေညာထားသော ကရင်အမျိုးသားအစည်းအရုံး၊ KNU ဗဟိုကော်မတီဝင်၊ နောင်လွမ်းရာ၊ အုန်းပန်မြို့နယ် ထိုင်းနိုင်ငံမှဖြစ်ကြောင်း သိရှိရသည့် အပြင် ၎င်းသည် KNU တပ်မဟာ ၆ တွင်လည်းကောင်း၊ KNU အထူးတပ်ရန်း ၁၀၁ ဝမ်ခဂိတ်တွင် KNU အဖွဲ့ဝင်ဖြစ်ပြီး KNU ဗဟို ညီလာခံ ဗဟိုကော်မတီအဖြစ် ၎င်းတာဝန်ထမ်းဆောင်ခဲ့ကြောင်း စုံစမ်းသိရှိရသဖြင့် ပြည်ထဲရေးဝန်ကြီးဌာန၏ (၃-၁၁-၁၈၈၉) ပါ အမိန့်ကြေညာစာ အမှတ် (၃/၈၉) ဖြင့် တရားမဝင်အသင်းအဖြစ် ကြေညာထားသော KNU တွင် တာဝန်ထမ်းဆောင်ခဲ့သည့် အတွက် သတင်းအဖွဲ့မှ တရားလိုပြုလုပ်ကာ တိုင်တန်းသဖြင့် မင်္ဂလာဒုံရဲစခန်းမှ (ပ) ၆၉၀/၁၁၊ မတရားအသင်း အက်ဥပဒေပုဒ်မ ၁၇(၁) ဖြင့် ဒီဇင်ဘာ ၈ ရက်တွင် အမှုဖွင့်ကာ ထပ်မံစစ်ဆေးလျက်ရှိသည်။

အမေရိကန်နိုင်ငံခြားရေးဝန်ကြီးရဲ့မြန်မာပြည်ခရီးစဉ်

အမေရိကန် နိုင်ငံခြားရေးဝန်ကြီး ဟီလာရီ ကလင်တန်နဲ့  ဒီမိုကရေစီခေါင်းဆောင် ဒေါ်အောင်ဆန်းစုကြည် သူမ၏နေအိမ်တွင်တွေ့ ဆုံ

1-12-2011       ဓါတ်ပုံ AP

အမေရိကန် နိုင်ငံခြားရေးဝန်ကြီး ဟီလာရီ ကလင်တန်နဲ့  ဒီကနေ့နေ့လည်က ဒီမိုကရေစီ

ခေါင်းဆောင် ဒေါ်အောင်ဆန်းစုကြည်ဟာ သူမ၏နေအိမ်တွင်တွေ့ ဆုံခဲ့သည်။

ဟီလာရီ ကလင်တန်ဟာ နေ့လည် ၁ နာရီ အမေရိကန်သံရုံးမှာ

သတင်းစာရှင်းလင်းပွဲလုပ်မယ်

လို့ သိရှိရပြီး ညမှာပြန်ထွက်ခွာမယ်လို့ လဲ သိရပါတယ်။

ဟီလာရီ ကလင်တန်၏ ညစာစားပွဲတွင် ဒေါ်အောင်ဆန်းစုကြည်နှင့်တွေ့ ဆုံ



အမေရိကန် နိုင်ငံခြားရေးဝန်ကြီး ဟီလာရီ ကလင်တန်ဟာ ယနေ့ညနေ၅နာရီထိုးက ရန်ကုန်သို့အမေရိကန်အစိုးရပိုင်လေယာဉ်ဖြင့်ရောက်ရှိလာပြီး တစ်ဆက်တည်းရွှေတိဂုံဘုရားကို ဖူးမျှော်ခဲ့

ကြောင်း သိရသည်။

 ယင်းနောက် ဟီလာရီ ကလင်တန်နှင့်အတူ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည် သွားရောက်တွေ့ ဆုံကာ ညစာစားပွဲတက်ရောက်ခဲ့ကြောင်း သိရသည်။

အမေရိကန် နိုင်ငံခြားရေးဝန်ကြီး ဟီလာရီ ကလင်တန် ရွှေတဂုံဘုရား ဖူးမျှော်

1-12-2011       ဓါတ်ပုံ ဒီမိုကောင်းကင်

အမေရိကန် နိုင်ငံခြားရေးဝန်ကြီး ဟီလာရီ ကလင်တန်ဟာ ဒီကနေ့ညနေ၅နာရီထိုးက ရန်ကုန်သို့အမေရိကန်အစိုးရပိုင်လေယာဉ်ဖြင့်ရောက်ရှိလာပြီး တစ်ဆက်တည်းရွှေတိဂုံဘုရားကို ဖူးမျှော်ခဲ့ကြောင်း သိရသသည်။

အမေရိကန် နိုင်ငံခြားရေး ၀န်ကြီး ဟီလာရီ ကလင်တန် မြန်မာ သမတ ဦးသိန်းစိန်နှင့် တွေ့ ဆုံ

၁-၁၂-၂၀၁၁

မြန်မာနိုင်ငံသို့  အမေရိကန်အစိုးရ အဆင့်ဖြင့်ထိပ်တန်း နိုင်ငံခြားရေးဝန်ကြီး ရောက်ရှိလာခြင်း

သည် ၅၇ နှစ်အတွင်း ပထမဆုံးအကြိမ်ဖြစ်ပါသည်။

မြန်မာနိုင်ငံသို့  ရောက်ရှိလာသော အမေရိကန် နိုင်ငံခြားရေး ၀န်ကြီး ဟီလာရီ ကလင်တန်ဟာ

 ဒီကနေ့ နေ့ လည်ပိုင်းမှာ နေပြည်တော် သမ္မတ အိမ်တော်မှာ သမ္မတ ဦးသိန်းစိန်နဲ့ တွေ့ဆုံခဲ့

ပါတယ်။

အမေရိကန် နိုင်ငံခြားရေးဝန်ကြီး ဟီလာရီ ကလင်တန်ဟာ သမ္မတ ဦးသိန်းစိန်အား ဒီမိုကရေစီပြုပြင်ပြောင်းလဲရေးကိုပြုလုပ်ရန်နှင့် နိုင်ငံရေးအကျဉ်းအာလုံးလွတ်ပေးရန် ကချင်ဒေသ ထိုးစစ်များရပ်တန့် ရန်နှင့် နိုင်ငံရေးတွင်ပြည်သူအားလုံးပါဝင်နိုင်ရန် တောင်းဆိုလိုက်သည်။

သမတ ဦးသိန်းစိန်မှ အမေရိကန် နိုင်ငံခြားရေး ၀န်ကြီး ဟီလာရီ ကလင်တန်အား မြန်မာနိုင်ငံ

ဒီမိုးကရေစီပြုပြင်ပြောင်းလဲရေးတွင် စီးပွားရေးပိတ်ဆို့ မှုများ ဖွင့်ပေးရန်တောင်းဆိုသည်ဟု

သိရှိရသည်။

မနက်ဖန် ၂ ရက်နေ့ မှာ မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်နှင့် အမျိုးသား ဒီမိုကရေစီအဖွဲ့ချုပ် အဖွဲ့ဝင်များနှင့်လည်ကောင်း၊ တခြားသော နိုင်ငံရေးပါတီများ၊ လူမှုအဖွဲ့အစည်း

များနှင့် လည်းကောင်းတွေ့ဆုံမည်ဖြစ်သည်။

အမျိုးသားပြန်လည်သင့်မြတ်ရေးအတွက် ဂျပန်နိုင်ငံရှိ မြန်မာသံရုံးရှေ့ တွင် တောင်းဆိုဆန္ဒပြ